मौसमी फ्लुको संक्रमण बढेसँगै विभिन्न खालका स्वास्थ्य समस्या पनि निम्तिएको छ । चिसो मौसम सुरुभएसँगै ज्वरो, रुघा खोकी, निमोनिया जस्ता समस्याका बिरामीहरुको अस्पताल धाउन थालेका छन् ।
मौसम परिवर्तन हुने समयमा स्वास्थ्यमा सामान्य समस्या आए पनि सर्तकता नअपनाउदा जटिलता निम्त्याउन सक्ने भन्दै चिकित्सकहरुले जोगिन आग्रह गरेका छन् ।
जाडो मौसम सुरु भएसँगै अधिकांशको स्वास्थ्यमा केही समस्या देखा पर्छ । चिसोका कारण अहिले ज्वरो, रुघा खोकी, निमोनियालगायतका समस्या भएका बिरामी अस्पताल धाउन थालेका छन् ।
कार्तिकको तेस्रोसातासम्म शुक्रराज ट्रपिकल तथा सरुवा रोग अस्पतालको ओपीडिमा दैनिक १२ देखी १५ जना आउने गरेको अहिले दैनिक ३५ देखि ४० जनासम्म मौसमी फ्लुकोका बिरामी पुग्ने गरेका छन् । जसमा उच्च ज्वरो आउने, सिंगान बग्ने, शरिर दुख्ने, स्वासप्रस्वासमा समस्या हुने जस्ता समस्या बढी पाइएको छ ।
चिसो बढेसँगै बालबालिका तथा बृद्धबृद्धाको स्वास्थ्यमा सामान्य समस्या आउने गर्छ नै । तर सामान्य मानिएको रुघाखोकीले गम्भिर जोखिम निम्त्याउन सक्ने चिकित्सक बताउछन् । मौसमी रुघाखोकी सामान्यतया एक साता सम्म मात्र रहन्छ । तर यसले दिर्घकालीन प्रभाव पार्नेदेखी ज्यानै जोखिम हुन सक्छ । त्यसैले समयमै सतर्क रहन चिकित्सकहरुको सुझाव छ ।
चिकित्सकका अनुसार चिसोबाट बच्न सके स्वास्थ समस्याबाट जोगिन सकिन्छ । सकेसम्म न्यानो लुगा लगाउने, पोषिलो तथा झोलीलो खानेकुरा खाने, रुघाखोकी लागेको व्यक्तिबाट कम्तीमा १ मिटरको दुरी कायम गर्ने, मास्क तथा स्यानीटाईजरको प्रयोग गर्ने गरेमा बच्न सकिन्छ ।
विषेशगरि वृद्धवृद्धा, गर्भवती महिला, बालबालिकाहरुलाई बढी जोखिम रहेकाले समयमै सतर्क हुन पर्दछ ।
