काठमाडौं – पछिल्लो समय सुन तस्करी प्रकरणले निकै चर्चा पाएको छ । अहिले पनि नेपालबाट हुने सुन तस्करी प्रकरण अनुसन्धानकै क्रममा छ ।
नेपाल प्रहरीको तथ्याङ्क अनुसार पछिल्लो एक दशकमा नेपालमा झण्डै सात सय किलो अवैध सुन जफत भएको छ। तस्करीमा संलग्न ७ सय जना भन्दा बढी पक्राउ परेका छन्। पक्राउ पर्ने तथा फरार हुनेमा अधिकांश मुख्य अभियुक्त भने चिनियाँ नागरिक रहेको खुलेको छ ।
जानकारहरुका अनुसार चिनियाँ तस्करले नेपाली युवाको नागरिकता र गरिबीको दुरुपयोग गरिरहेका छन्। उनिहरुका अनुसार भारतीय र नेपाली व्यापारी चिनियाँ तस्करको भरिया बन्ने गरेका छन्। प्रहरी अनुसन्धान अनुसार पछिल्लो एक क्विन्टल सुन काण्डमा पनि स्थानीय भरिया व्यापारीबाहेक मुख्य लगानीकर्ता चिनियाँ नै देखिएका छन्।
विमानस्थल भित्रको प्रविधि र जनशक्तिको कमजोरीमा पटकपटक खेलीरहेका चिनियाँ व्यापारीले, यो सुन छुटाउन त्रिभुवन अन्तर्राष्ट्रिय विमानस्थल भन्सार कार्यालयका कर्मचारीलाई, माओवादी केन्द्रका उपाध्यक्ष कृष्णबहादुर महरा र उनका छोरा राहुल महरालाई प्रयोग गरेको नेपाल प्रहरीको केन्द्रीय अनुसन्धान ब्यूरो (सिआइबी) ले तयार पारेको अनुसन्धान प्रतिवदेनमा उल्लेख छ।
सरकारी वकिलको कार्यालयमा बुझाएको उक्त प्रतिवेदन अनुसार महरा बाबुछोराले भन्सार विभागका कर्मचारीलाई पटकपटक फोन गरेर भन्सार कार्यालयमा थन्किएको उक्त ई–सिगरेट लिलामी गर्न दबाब दिएका थिए।
यसअघि पनि प्रहरी प्रशासनलाई छक्याउँदै रसुवागढी नाका हुँदै २०७४ साल भदौमा काठमाडौं भित्र्याइएको ८८ किलो सुन तस्करीमा संलग्न मुख्य अभियुक्त घटना लगत्तै फरार भएका थिए। नेपालमा होटल व्यवसाय दर्ता गरेर त्यसैको आडमा तस्करीको धन्दा चलाई रहेको चिनियाँ दम्पत्ति याङ वेन विङ र उनका पति पान विइ मिङलाई काठमाडौं जिल्ला अदालतले ४३ करोड ५६ हजार रुपैयाँ जरिवाना र पाँचवर्ष कैद सजायको फैसला गरेको छ। तर चालक मनोज अधिकारीबाहेक कोही फेला परेका छैनन्।
नेपालमा उच्च राजनीतिक नेतृत्वमा पहुँच बढाई रहेका चिनियाँ तस्करले होटल, रेस्टुराँ र अन्य व्यापारको आवरणमा अवैध धन्दामा जरो गाडी रहेका छन्। नेपालमा सुन तस्करी, डलर तस्करी, बैंकिङ अपराध, ठगी देखि चोरीका घटना सम्ममा चिनियाँ नागरिकको संलग्नता देखिएको छ ।
पर्यटक तथा पर्यटन व्यवसायीका रुपमा नेपाल भित्रिएका धेरै चिनियाँ अपराध जालोमा जोडीन थालेपछि, प्रहरीले चिनियाँहरुको चहलपहल बढी रहेको ठमेल, बौद्ध, महाबौद्ध, स्वयंभु, बालुवाटार तथा उपत्यकाको यसअघि नै पहिचाहन भएको चिनियाँ तस्कर बस्ने क्षेत्रमा निगरानी बढाएको छ।
