सफल हुने प्रेरणा कुनै लक्ष्यलाई पाइछोड्ने इच्छाबाट जन्मिन्छ । नेपोलियन हिलले एक ठाउँमा त्यो आशयलाई मिल्नेगरी लेखेका छन् । मान्छेको दिमागले जे जे सोचेर जुन जुन कुरामा विश्वास गर्नसक्छ, त्यो वास्तवमै पाउनसक्छ ।
कुनै एकजना युवकले सुकरातसँग सफलताको रहस्य सोध्यो । सुकरातले त्यो युवकलाई भोलिपल्ट बिहान नदी किनारमा भेट्न बोलाए । अर्काे दिनको घटना हो, पर्खिराखेको युवकलाई सुकरातले आफूसँगै पानीमा हिँडाए । पानी उनीहरुको घाँटीघाँटीसम्म आएपछि सुकरातले एकाएक युवकको टाउको अँठ्याएर डुबाइदिए । आत्तिदै छटपटाएको युवकले टाउको बाहिर निकाल्नखोज्यो । सुकरात निकै बलिया थिए अँठ्याएर डुबाइनै राखे । छिनभरमै युवकको शरीर, निलाम्य भयो । उनले युवकलाई छोडिदिए । पानीबाट टाउको निकाल्नेबित्तिकै त्यस युवकले गहिरो सास फे-यो ।
सुकरातले सोधे ‘टाउको डुबेको बेला सबैभन्दा आवश्यक वस्तु केलाई ठान्यौ ? युवकले भन्यो ‘हावा’ । सुकरातले भने ‘सफलताको रहस्य यही हो । पानीभित्र हुँदा तिमीले हावाको तीव्र इच्छा राख्यौ । त्यही तीव्र इच्छा सफलताका लागि राख, तिमी अवश्य सफल हुनेछौ । सफलताका लागि यसबाहेक अरु कुनै रहस्य छैन ।
तीव्र इच्छा हरेक उपलब्धिको प्रस्थानविन्दु हो । धिपधिपे आगोले तातोपना दिन नसकेजस्तै कमजोर इच्छाले पनि महान परिणाम ल्याउँदैन ।
साभारः ‘तपाईंको जीत’ पुस्तकबाट
