नेकपा एमालेले राष्ट्रिय सभा बैठक अवरुद्ध गरेको छ । सोमबारको बैठकमा एमाले सांसद दिलकुमारी रावलले सुन तस्करी प्रकरणमा उच्चस्तरीय छानविन समिति गठनमा सरकारले वेवास्ता गरेको भन्दै समिति नबनेसम्म सदन अघि बढ्न नसक्ने बताएकी थिइन् ।
बैठकको सुरुमै एमाले सांसदहरु आसनबाट उठेर विरोध जनाएका थिए । अध्यक्ष गणेश तिमिल्सिनाले रावललाई बोल्न समय उपलब्ध गराएपछि रावलले सरकारमा आवद्ध राजनीतिक दलकै नेता कार्यकर्ता सुन तस्करीमा मुछिएको भन्दै सरकार सुन तस्करी प्रकरणमा निष्पक्ष छानविनको पक्षमा नदेखिएकाले बैठक चल्न नसक्ने बताएकी थिइन् । एमाले सांसदहरुले सुन तस्करी प्रकरणमा उच्चस्तरीय छानविन समिति गठन नगरेसम्म संसद बैठक चल्न नदिने बताउँदै आएका छन् ।
अध्यक्ष तिमिल्सिनाले शीर्ष नेताहरुबीच बैठक संचालनमा ल्याउन प्रयास गरेपनि जारी प्रयास असफल भएपछि राष्ट्रिय सभाको अर्को बैठक साउन २४ गते दिउँसो १ बजे बस्नेगरी स्थिगित भएको हो ।
