काठमाडौं।नेपाल समाजवादी पार्टी (नेसपा) का अध्यक्ष तथा पूर्वप्रधानमन्त्री डा.बाबुराम भट्टराईले ललिता निवास सरकारी जग्गा प्रकरणमा आफूमाथि छानबिनमा पूर्ण रूपमा साथ दिने प्रतिबद्धता जनाएका छन् । आइतबार सर्वोच्च अदालतले ललिता निवास सार्वजनिक जग्गा सम्बन्धमा पूर्वप्रधानमन्त्रीद्वय डा.भट्टराई र माधवकुमार नेपालमाथि पनि छानबिन गर्न आदेश दिएको थियो ।
सो आदेशपछि प्रतिक्रिया दिँदै डा.भट्टराईले भने,‘ललिता निवास प्रकरणमा सम्मानित सर्वोच्च अदालतले दिएको निर्देशन अनुरूप छानबिन भएमा त्यसमा पूर्ण रूपले सहयोग गर्न मेरो प्रतिबद्धता रहेको छ । केही समय पहिले अख्तियार दुरूपयोग अनुसन्धान आयोगले गरेको छानबिनमा पनि मैले सहर्ष सहयोग गरेको सर्वविदितै छ !’
डा।भट्टराईले अख्तियारले लिएको बयान पनि यसअघि नै सार्वजनिक गरेका छन् । ललिता निवासलगायत जुनसुकै प्रकरणमा मन्त्रिपरिषद्लगायत सबै तहबाट भएका निर्णयहरूमाथि निष्पक्ष छानबिन गरेर कानूनविपरित, राज्यलाई नोक्सान हुने,निजी लाभ लिने ढंगले कार्य भए, गरेको भए जतिसुकै उच्च तहको व्यक्ति भए पनि कानूनअनुसार कार्बाही गरिनुपर्नेमा डा.भट्टराईको जोड छ ।
उनले देशमा विधिको शासन कायम गर्नुपर्नेमा आफ्नो आजीवन मान्यता र प्रतिबद्धता रहेको बताएका छन् । पूर्वप्रधानमन्त्री डा.भट्टराईले आफू प्रधानमन्त्री कालमा भएका सबै निर्णयहरूको निष्पक्ष छानबिन गर्न र आवश्यक कार्बाही गर्न सरकार र सम्बन्धित निकायलाई अनुरोध गरेका छन् ।
उनी भन्छन्,‘ललिता निवासलगायत जुनसुकै प्रकरणमा राज्यका मन्त्रिपरिषद्लगायत सबै तहबाट भएका निर्णयहरू उपर निष्पक्ष छानबिन गरेर कानूनविपरित, राज्यलाई नोक्सान हुने, निजी लाभ लिने ढंगले कार्य भए,गरेको भए जतिसुकै उच्च तहको व्यक्ति भए पनि कानूनअनुसार कार्बाही गरिनुपर्छ र देशमा विधिको शासन कायम गरिनुपर्छ भन्ने मेरो आजीवन मान्यता र प्रतिबद्धता रहेको छ । अतः मेरो प्रम कालमा भएका सबै निर्णयहरूको निष्पक्ष छानबिन गर्न र आवश्यक कार्बाही गर्न सरकार र सम्बन्धित निकायलाई मेरो विनम्र आग्रह छ ।’
डा. भट्टराई २०६९ सालमा प्रधानमन्त्री थिए ।
