काठमाडौँ – टिकटकमा काठमाडौँ महानगरपालिकाका प्रमुख बालेन्द्र शाह ९बालेन० को समर्थन र हिन्दी सिनेमा नरोक्न उच्च अदालतको आदेशविरुद्ध विशाल र्याली निकालिएको भनी दाबी गरिएको भिडियो भाइरल भइरहेको छ ।
मेयर बालेनले काठमाडौँमा हिन्दी सिनेमा प्रतिबन्ध लगाउने घोषणाविरुद्ध उच्च अदालतको आदेशको विरोधमा विशाल र्याली निकालिएको भिडियो टिकटकमा भाइरल भइरहेको हो । यद्यपि उक्त भिडियो भारत उडिसामा भएको रथयात्राको भएको पाइएको छ ।
प्रयोगकर्ताले उक्त भिडियो टिकटकमा अपलोड गरेका थिए । १७ सेकेण्डको उक्त भिडियोमा लाखौँ मानिसहरु सडकमा ओर्लिएको देखिन्छ । उक्त भिडियोमा लेखिएको छ, ‘उच्च अदालत पाटनले हिन्दी फिल्म नरोक्न अन्तरिम आदेश जारी गरेपछि उच्च अदालतको विरुद्ध काठमाडौँको दृश्य’ ।
उक्त भिडियो छोटो समयमा नै टिकटकभर भाइरल भएपनि यसको सत्यतथ्यबारे खासै चासो दिइएको थिएन । तर, यसबारे जाँच गर्दा उक्त भिडियो उडिसामा भएको रथयात्राको भएको पाइएको हो । टिकटकमा अपलोड गरिएको भिडियोमा काठमाडौँ शहरकोजस्तो संरचना पनि देखिएको थिएन ।
बालेनको समर्थनमा मानिसहरुको भीड भनी दाबी गरिएको उक्त भिडियो टिकटकमा अपलोड गर्नुअघि ‘युट्युब सर्ट’ मा धेरै भारतीय च्यानलहरुले अपलोड गरेको पाइएको छ । भारतीय प्रयोगकर्ताले अपलोड गरेका ती भिडियोहरु उडिसाको पुरीमा आयोजना गरिएको जगन्नाथ रथयात्राको भएको पत्ता लागेको छ ।
