कपिलवस्तु । बझाङबाट काठमाडौं आउँदै गरेको यात्रुबाहक रात्री बस कपिलवस्तुमा दुर्घटना भएको छ। ना ६ ख १३३९ नम्बरको नाइट बस आज विहान ५ बजे कपिलवस्तुको शिवराज नगरपालिका-३ देउराली मोडमा दुर्घटना भएको हो।
दुर्घटनामा परी ६ जना घाइते भएको जिल्ला प्रहरी कार्यालय कपिलवस्तुका प्रवक्ता डिएसपी मिन बहादुर घलेले जानकारी दिए । उनका अनुसार बसमा ४० यात्रु सवार थिए ।
घाइतेहरूमा चार पुरूष र दुई महिला छन्। घाइतेहरुको अवस्था सामान्य रहेको डिएसपी घलेले जानकारी दिए । उनीहरूको चनौटास्थित सञ्जिवनी अस्पतालमा उपचार भइरहेको छ । तीव्र गति र मोड भएका कारण दुर्घटना भएको डिएसपी घलेले बताए।
सकुशल रहेका यात्रुहरूलाई अर्को बस चढाएर काठमाडौं पठाइएको छ। दुर्घटनापछि चालक भने फरार छन् । प्रहरीले सहचालकसँग दुर्घटनाबारे सोधपुछ गरेको र फरार रहेका चालकको खोजीकार्य भइरहेको प्रहरीले जनाएको छ ।
