काठमाडौं । एमाले अध्यक्ष केपी शर्मा ओलीलाई भेट्न नेता वामदेव गौतम च्यासल पुगेका छन् । एमालेले ७० वर्षे उमेर हद हटाएपछि आइतबार पहिलो नेता गौतम अध्यक्ष ओलीलाई भेट्न एमाले पार्टी कार्यालय च्यासल पुगेका हुन् ।
नेकपा एकता अभियानका संयोजक गौतमले यसअघि गत जेठ २४ गते अध्यक्ष ओलीले बोलाएमा खुसीसाथ एमालेमा फर्किने बताएका थिए । एमालेले ७० वर्षे उमेरहद हटाएपछि गौतम एमालेमा फर्किन इच्छुक देखिएका छन् ।
राष्ट्रियसभाका सदस्यसमेत रहेका नेता गौतमले हालसम्म एमालेको सदस्यता भने त्यागि सकेका छैनन् । पछिल्लो समय गौतमले पार्टीले आफ्नो योग्यताअनुसारको भूमिका दिएमा सक्रिय हुने बताउँदै आएका छन् ।
