काठमाडौं । आर्थिक वर्ष २०८०/८१ को बजेटमा मा साधारण खर्चमा वृद्धि हुँदै गएको अर्थमन्त्री डा। प्रकाशशरण महतले बताएका छन् । सोमबार संसदमा बजेट भाषण गर्दै उनले यस्तो बताएका हुन् । तलब भत्ता, सामाजिक सुरक्षा, वित्तीय हस्तान्तरण, प्रशासनिक खर्च लगायतको साधारण खर्च तथा बढ्दो ऋण भुक्तानी दायित्व व्यवस्थापन गर्न मात्र करिव रु १२ खर्ब ८० अर्ब २५ करोड विनियोजन गर्नु परेको अर्थमन्त्रीले बताएका छन् ।
यो रकम कूल बजेटको ७३.१० प्रतिशत हुन आउँछ। कुल बजेटको ठूलो हिस्सा यसरी छुट्याउनु पर्दा विकास कार्यका लागि स्रोत व्यवस्थापनमा चाप परेकोे उनको भनाइ रहेको छ ।
यस्तै बजेट भाषण गर्दै अर्थमन्त्री महतले प्रयोगविहीन सरकारी गाडी तत्काल लिलामी गरिने बताएका छन् । साढे ३८ अर्ब वैदेशिक सहायता अपेक्षा गरेकोमा जम्मा २४ अर्बमात्रै आउने अनुमान रहेको उनको भनाइ रहेको छ । अनलाइनबाटै कम्पनी दर्ता र खारेज,अविष्कारमा पुँजीगत बजेटको १ प्रतिशत रकम रहेको अर्थमन्त्री महतले बताए ।
