गण्डकी प्रदेश सरकारको मुख्यमन्त्रीमा कांग्रेस संसदीय दलका नेता सुरेन्द्रराज पाण्डे नियुक्त भएका छन् । पाण्डेले शपथ ग्रहण भने शुक्रबार दिउँसो मात्र लिने बताइएको छ । विहीबार दिउँसो गण्डकी प्रदेशका प्रदेश प्रमुख पृथ्वीमान गुरुङले संविधानको धारा १६८ को उपधारा २ बमोजिम २ वा २ भन्दा बढी दलको समर्थनमा बहुमत जुटाएका प्रदेश सभा सदस्यका हैसियतमा पाण्डेलाई मुख्यमन्त्री नियुक्त गरेका हुन् ।
कांग्रेसका २७, माओवादीका ७ र मनाङ जिल्लाबाट स्वतन्त्र रुपम सर्वसम्मत निर्वाचित भएपछि एकीकृत समाजवादी प्रवेश गरेका राजीव गुरुङको हस्ताक्षरसहित सुरेन्द्रराज पाण्डेलाई मुख्यमन्त्री नियुक्त गर्न दाबी पेश गरिएको हो । संघ सरकारको सत्ता समीकरण फेरिएसँगै नेकपा माओवादीका भौतिक पूर्वाधार मन्त्री हरिबहादुर चुमान र पर्यटन मन्त्री रेशम जुग्जालीले राजीनामा दिँदै चैत १० गते समर्थन फिर्ता लिएपछि एमालेका नेता खगराज अधिकारी नेतृत्वको सरकार अल्पमतमा परेको थियो । खगराजले वैशाख ९ गते प्रदेशसभामा विश्वासको मत पाउन सकेका थिएनन् ।
संविधानको धारा १६८ (३) बमोजिम ठूलो दलको हैसियतमा मुख्यमन्त्री नियुक्त गर्ने कि उपधारा २ बमोजिम नै बहुमतको सरकार गठन गर्न आह्वान गर्ने भन्ने अन्योल थियो । कानुनी परामर्शपछि सरकार ढलेको ३ दिनपछिमात्र प्रदेश प्रमुख गुरुङले उपधारा २ बमोजिम नै बहुमतको सरकारका निम्ति आह्वान गर्नुभएको थियो । पाण्डेले गोर्खा निर्वाचन क्षेत्र नं २ (२) वाट निवाचित पाण्डे नेपाली काँग्रेसका केन्द्रीय सदस्य समेत हुन् ।
प्रदेश प्रमुख पृथ्वीमान गुरुङले नियुक्ति पत्र दिँदै भन्नुभयो ‘मंसिंरमा सम्पन्न निर्वाचनपछि दोस्रो पटक सरकार बनेको छ, अब विगतको जस्तो किसिमबाट काम गरेर पुग्दैन, पर्यटन र औद्योगिक विकासमा ध्यान दिँदै सम्पूर्ण जनताको भविष्य सुदृढ र समृद्ध तर्फ एकातावद्ध भएर अगाडि वढ्नु पर्ने हुन्छ ।’ उपनिर्वाचनको परिणामले सरकार र संसदलाई ठूलो चेतावनी दिएको छ, पुराना दलहरुले पुरानै किसिमले काम गरेर पुग्दैन्, अब जनताका मन जितेर उनीहरुको हितमा काम गर्न जरुरी छ उहाँले भन्नुभयो– अबको सरकारले प्रत्यक्ष सरोकर राखेर उनीहरुलाई नयाँ ढंगबाट सेवा दिन जरुरी छ ।
मुख्यमन्त्री नियुक्त हुनुभएका सुरेन्द्रराज पाण्डेले संचारकर्मीसँग आफ्ना भनाइ राख्दै गठबन्धनका तीनै दलबाट मन्त्रीहरु नियुक्त गर्ने प्रयास आफ्नो रहने बताउँदै मन्त्रिमण्डल सात सदस्यीय हुने जानकारी दिनुभयो । ‘गठबन्धनमा सहभागी दलहरुको सहमतीमा नै आफू अगाडि वढ्ने । पर्यटन, जलविद्युत र कृषि क्षेत्रलाई विशेष महत्व दिने छौ, उहाँले भन्नुभयो– कृषिमा आधारित रहेर स्वरोजगार कसरी बन्न सकिन्छ भनेर अगाडि वढ्छौ ।’
