काठमाडौं । काठमाडौँ महानगरपालिकाका प्रमुख बालेन्द्र साह बालेनको हठका कारण विगत नौ दिनदेखि सिंहदरबारभित्र र शीतल निवास क्षेत्रबाट फोहोर उठ्न सकेको छैन । जसकारण ती क्षेत्रमा दुर्गन्ध फैलिन थालेको छ । संघीय सरकारलाई अप्ठेरो पार्न स्थानीय तहका प्रमुख नै लागेपछि प्रधानमन्त्री पुष्पकमल दाहाल प्रचण्ड निकै आक्रोशित भएका छन् ।
मन्त्रिपरिषद्को केही दिनअघि बसेको बैठकले फोहोर व्यवस्थापनको विषयमा काडमाडौं महानगरपालिकासँग छलफल गर्ने निर्णय गरेको थियो । तर यसबीचमा महानगर प्रमुख बालेनको हर्कत निकै बढ्दै गएपछि सरकार महानगरसँग संवाद नै नगर्ने मनस्थितिमा पुगेको स्रोतले बतायो ।
महानगर प्रमुख बालेनको निर्देशनमा फोहोर ल्यान्डफिल साइटमा लैजान रोकेपछि वर्गीकरण गरेर सिंहदरवारभित्रै फोहोर व्यवस्थापनको विकल्प खोजिएको छ। सिंहदरवारभित्रको फोहोरमैला व्यवस्थापनको जिम्मा पाएको परिवर्तन सेवा प्रालिले पाएको छ । अहिले सरकारले पुनः प्रयोग हुने र कुहिने फोहोर छुट्याएर व्यवस्थापनको काम गर्न निर्देशन दिएको छ ।
सिंहदरवारबाट कुहिने र नकुहिने गरी दैनिक पाँच टन फोहोर उत्पादन हुँदै आएको छ । जसमध्ये करिब दुई टन फोहोर ल्यान्डफिल साइट लैजान पर्ने फोहोर उत्पादन हुने गर्दछ, अहिले त्यही फोहोर मात्र थुप्रिएको छ । सरकारी कायालयबाट प्रायः नकुहिने फोहोर निस्कने हुनाले त्यति छिट्टै समस्या नआए पनि क्यान्टिनबाट धेरै फोहोर निस्किँदा दुर्गन्धित हुने खतरा रहेको सफाइ कर्मचारीहरूले बताएका छन् ।
बागमती नदी किनारका सुकुम्बासीको घरटहरा भत्काउन गृह र सहरी विकास मन्त्रालयले सहयोग नगरेको भन्दै बालेनले घोषणा गरेरै सिंहदरबारको फोहोर उठाउन नदिएका हुन् । यसले अब संघीय सरकार र स्थानीय सरकारबीच टकरावको स्थिति देखापरेको छ ।
