पोखरा, २८ चैत । राष्ट्रिय प्रजातन्त्र पार्टीका अध्यक्ष राजेन्द्र लिङदेनले सुशासन, विकास र जनताको सेवालाई केन्द्र बिन्दुमा राखेर सरकार अगाडि वढ्नु पर्नेमा जोड दिनुभएको छ । राष्ट्रिय प्रजातन्त्र पार्टी गण्डकी प्रदेश स्तरीय विस्तारित बैठक एवं अगुवा कार्यकर्ता भेलालाई मंगलबार पोखरामा सम्बोधन गर्दै अध्यक्ष लिङदेनले भन्नुभयो–‘ हामीले देशकोे व्यवस्था त परिवर्तन गर्यौ तर जनताको अवस्था फेर्न सकेका छैनौ ।’
नेपालमा राजनीति उद्योगको रुपमा विकास भएको आरोप लगाउँदै उहाँले कुनै पनि कालखण्डमा भएका भ्रष्टाचारको छानबिन हुनुपर्नेमा जोड दिनुभयो । ‘आफू ऊर्जा मन्त्रीहुँदा ठूलाठूला निर्णय भए तर मैले एक रुपैयाँ पनि अनियमितता गरिन्, अध्यक्ष लिङदेनले भन्नुभयो– भ्रष्टाचार गर्नुभनेको नेपाली आमाको रगत खानु सरह हो ।’
अहिले जतिपनि भ्रष्टाचार र कमिसन काण्डहरु आईरहेका छन् ती सबै खराब व्यवस्थाका कारण आईरहेको उहाँले बताउनुभयो । राष्ट्रिय स्वतन्त्र पार्टी (रास्वपा)का सांसद ढाकाकुमार श्रेष्ठको अडियो काण्डबारे आफ्नो धारणा राख्दै उहाँले भन्नुभयो– ‘अहिलेको व्यवस्थामै दोष छ । यही कारण यस्ता खालका घटना पटक दोहोरिरहन्छन् ।’
राप्रपा अहिले बलियो प्रतिपक्षको रुपमा संसदमा प्रस्तुत भएको बताउँदै उहाँले आफ्ना एजेण्डालाक्ष्ई सम्बोधन गर्ने सर्तमा मात्र सरकारमा सहभागी हुने बताउनुभयो । यस अघि पनि पृथ्वी जयन्ती मनाउने सर्तमा नै सरकारमा गएको हौं, उहाँले भन्नुभयो– राप्रपा राष्ट्रियता, संवैधानिक राजसंस्था, सुशासन, सारभौमसत्ता: जनतामा निहीत र विकास निर्माणको कार्यलाई केन्द्रबिन्दुमा राखेर मात्र अगाडि वढ्छ । ’
संक्रमणकालीन न्यायमा राज्य एकपक्षीय रुपमा प्रस्तुत भएको हो कि भन्ने देखिएको बताउँदै उहाँले भन्नुभयो–‘अहिले एकपक्षलाई मात्रै न्याय दिलाउने, द्वन्द्वका अन्य पीडितहरुलाई उपेक्षा गर्ने र उनीहरुको घाउमा अझ नूनचुक छर्नेगरी राज्य प्रस्तुत भएको छ ।’ द्वन्द्वमा राज्य वा विद्रोही दुबै पक्षमा नलागेका तर सबैभन्दा बढी जनधनको क्षेती ब्यहोरेका वास्तविक पीडित सर्वसाधारण जनता भएकाले उनीहरुले नयाय पाउनुपर्नेमा उहाँको जोड थियो ।
देशको अर्थतन्त्र गम्भीर संकटमा पुगेको बताउँदै उहाँले सरकारले वित्तीय संस्थाले लिँदै आएको चर्को व्याजदर घटाएर ऋणीलाई केही हदसम्म भएपनि व्याजदरमा सुबिधा दिनुपर्नेमा जोड दिनुभयो । राज्यका अधिकाशं संस्थाहरुको पैसा सदुपयोग नभई बैंकबाट व्याज मात्र खाइरहेको भनाइ उहाँको छ । आयल निगम, टेलिकम, संचयकोष, नागरिक लगानीकोष जस्ता संस्थाले पैसा व्याजमा लगाएर बसेको आरोप उहाँको छ । गण्डकी प्रदेश स्तरीय अगुवा कार्यकर्ता भेलाको अध्यक्षता राप्रपा गण्डकीका अध्यक्ष पञ्चराम गुरुङले गर्नुभएको थियो । साथै अगुवा कार्यकर्ता भेलापछि संचारकर्मीसँग कुरा गर्दै अध्यक्ष लिङदेनले राप्रपा तत्काल सरकारमा नजाने उहाँले बताउनुभयो ।
