काठमाडौँ – सरकारले डेङ्गी नियन्त्रण तथा रोकथाममा यथेष्ट ध्यान नदिँदा समस्या सिर्जना हुने भएको छ । दसैँ सँगै डेङ्गीका बिरामीहरू घर जाँदा गाउँ गाउँसम्म डेङ्गी फैलिन सक्ने स्वास्थ्य तथा जनसङ्ख्या मन्त्रालयले जनाएको छ ।
स्वास्थ्य तथा जनसङ्ख्या मन्त्रालयका अनुसार २०७९ साउन १ गतेयता हालसम्म कुल २४ हजार ४९२ जना डेङ्गीका बिरामी भेटिएका छन् भने ७६ जिल्लामा फैलिसकेको छ र देशभर २९ जनाको मृत्यु भइसकेको छ ।
नेपालमा डेङ्गीको बिरामी पहिलो पटक २०६१ सालमा देखिएका थिए । त्यसपछि डेङ्गीका बिरामी नेपालमा बर्सेनि देखिँदै आएका छन् ।
मन्त्रालयका अनुसार गत साउन १ गते यता सबैभन्दा बढी डेङ्गीका बिरामी बागमति प्रदेशमा देखिएका छन् । यो अवधिमा बागमती प्रदेशमा १९ हजार डेङ्गीका बिरामी भेटिएका छन् ।
यस्तै, प्रदेश १ मा ७५३, मधेस प्रदेशमा ३२३, गण्डकी प्रदेशमा ५३७, लुम्बिनी प्रदेशमा २ हजार ८७२, कर्णाली प्रदेशमा २३० र सुदूरपश्चिम प्रदेशमा ७७७ जना डेङ्गीका बिरामी भेटिएको मन्त्रालयले जनाएको छ ।
