काठमाडौं। मुलुकको उपराष्ट्रपति चयनका लागि मतदान सम्पन्न भएको छ।नयाँ उपराष्ट्रपतिको निर्वाचनका लागि शुक्रबार भएको मतदानको साढे ३ बजेबाट मतगणना सुरु हुनेछ ।आजै उपराष्ट्रपति निर्वाचनको प्रमाणपत्र प्रदान गरिने तयारी रहेको निर्वाचन आयोगले जनाएको छ । मतगणना नयाँ बानेश्वरस्थित संसद् भवनमा हुनेछ ।
संघीय संसद भवन नयाँबानेश्वरमा विहान १० बजे सुरु भएको मतदान अहिले ३ बजे सकिएको हो । ८ सय ८२ मतदाता रहेकामा ८ सय २९ मत खसेको निर्वाचन अधिकारी ठाकुर भट्टराईले जानकारी दिए।
उनका अनुसार संघीय संसदतर्फ ३ सय ३२ मतदातामध्ये ३ सय ११ जनाले मतदान गरेका छन्। राप्रपाका १४ सांसद र नेमकिपाका एक गरी १५ सांसदले मतदान गरेनन्।
रामचन्द्र पौडेल, शहनाज रहमान, चन्द्र भण्डारी, टेकबहादुर गुरुङ, लक्ष्मी महतो कोइरी र वर्षमान पुनको मत खसेन । पौडेल राष्ट्रपति निर्वाचित भएका कारण मत हाल्न पाएनन्। रहमानको मृत्यु भइसकेको छ। गुरुङ निलम्बित छन् भने कोइरी फरार सूचीमा छन्। पुन र भण्डारी विदेशमा उपचाररत छन्।
प्रदेशतर्फ ५ सय ५० प्रदेशसभा सदस्यमध्ये ५ सय १८ जनाले मतदान गरेका छन्। निर्वाचनमा सङ्घीय संसद्का तीन सय ३२ सांसद र प्रदेशसभाका पाँच सय ५० प्रदेशसभा सदस्य मतदाता छन् । सङ्घीय संसद् सदस्यको मतभार ७९ र प्रदेशसभा सदस्यको मतभार ४८ कायम रहेको छ ।
राष्ट्रपतिको अनुपस्थितिमा राष्ट्रपतिबाट गरिने कार्य उपराष्ट्रपतिबाट सम्पादन गरिने संवैधानिक व्यवस्था छ । उपराष्ट्रपति मर्यादाका हिसाबले राज्यको दोस्रो माथिल्लो पद हो । नेपालको संविधानमा उपराष्ट्रपतिको पदावधि निर्वाचित भएको मितिले पाँच वर्षको हुने उल्लेख छ । यसैगरी दुई पटक उपराष्ट्रपति निर्वाचित भइसकेको व्यक्ति उपराष्ट्रपतिको निर्वाचनमा उम्मेदवार हुन नसक्ने संवैधानिक प्रावधान छ ।
