पोखरा, ११ फागुन । बैंक तथा वित्तीय संस्थाको ज्यादती र चर्को ब्याजदरको बिरोधमा पोखराका उद्योगी व्यवसायी सडक आन्दोलनमा उत्रिएका छन् । उद्योग व्यापार चलायमान नहुँदा अर्थतन्त्र नबच्ने भन्दै उनीहरुले बैंकिङ दबाब बन्द गर्नुपर्ने, व्याजदर एक अंकमा झार्नुपर्ने, व्याजमा मनपरी प्रिमिय बन्द गर्नुपर्ने, उद्योगी व्यवसायीलाई पीडित घोषणा गर्नुपर्ने, तरलता समस्या समाधान गर्नुपर्ने मागसहित बिहीबारदेखि सडक आन्दोलन थालेका हुन् ।
बैंक तथा वित्तीय संस्था सम्बन्धी समस्या समन्वय समितिले बिहीबार पोखराको चिप्लेढुंगामा एक घण्ट सवारी आवागमन बन्द गरेर धर्ना दिएको हो । विरोध कार्यक्रममा उद्योगी व्यवसायीहरुको प्रतिनिधित्व रहने १०० विभिन्न संघसंस्थाका प्रतिनिध ब्यानरसहित उपस्थित थिए ।
कार्यक्रममा समन्वय समिति संयोजक एवं पोखरा उद्योग वाणिज्य संघका अध्यक्ष पवनकुमार प्रजापति, नेपाल उद्योग वाणिज्य महासंघका केन्द्रीय सदस्य एवं लेखनाथ उद्योग वाणिज्य संघ पूर्व अध्यक्ष बाबुराम गिरी, नेपाल उद्योग वाणिज्य महासंघ गण्डकी प्रदेश अध्यक्ष संजीवबहादुर कोइराला, पोखरा उद्योग वाणिज्य संघका वरिष्ठ उपाध्यक्ष गोकर्ण कार्की लगायतले बोलेका थिए ।
उनीहरुले यो प्रारम्भिक आन्दोलन भएको तर माग सुनुवाइ नभए बैंकमा ताला लगाउने दिन पनि आउन सक्ने र त्यसको जिम्मेवारी बैंकले लिनुपर्ने चेतावनी दिए । साथै उनीहरुले राष्ट्र बैंक घेर्न जाने चेतावनीसमेत दिएका छन् । उनीहरुले बैंक तथा वित्तीय संस्थाको कारण व्यवसायी तथा ऋणिहरु आत्मदाहको अवश्थामा पुगेका र कतिपय आत्मदाह गरिसकेकोले राज्य, बैंक तथा वित्तीय संस्था राष्ट्र बैंक चुपचाप बसेको बताए ।
उद्योग व्यवसायीहरुले कोरोना महामारीका कारण थला पर्दै आएको आफ्नो व्यवसायी चलायमान अवस्थामा नरहेको र बैंक तथा वित्तीय संस्थाले मनोमानी ढंगले गरेको व्याजदर वृद्धि तत्काल घटाउनुपर्नेमा मागलाई प्राथमिकताका साथ उठाएका छन् ।आफूहरुलाई बैंक तथा वित्तीय संस्थाका कर्मचारीले साँझ बिहान फोन गरेर तनाब दिएको र घरमै आएर दबाब दिने गरेको उनीहरुको गुनासो छ ।
