काठमाडौँ । उपप्रधान एवं अर्थमन्त्री विष्णु पौडेलले स्रोतसाधनको अधिकतम सदुपयोग गर्दै वातावरण संरक्षणका क्षेत्रमा उच्च प्राथमिकताका साथ काम गरिरहेको नेपाललाई सक्दो सहयोग गर्न युरोपेली युनियनसँग अनुरोध गरेका छन् ।
डेलिगेसन अफ द युरोपियन युनियन टु नेपाल कार्यालयद्वारा आज यहाँ आयोजित कार्यक्रममा उपप्रधानमन्त्री पौडेलले वातावरण संरक्षण र नेपाली जनताको आर्थिक सामाजिक–रूपान्तरणका पक्षमा सक्दो सहयोग गर्न अनुरोध गरेका छन् ।
उनले कोरोना भाइरस (कोभिड) सङ्क्रमणपछिको अवस्थामा जनताको आर्थिक–सामाजिक रूपान्तरण र वातावरण संरक्षणका क्षेत्रमा स्पष्ट नीति तथा कार्यक्रमका साथ क्रियाशील रहेको नेपाललाई कृषि, शिक्षा, स्वास्थ्य, कुपोषण, पर्यटन, जलविद्युत्लगायतका क्षेत्रमा युरोपेली युनियनबाट प्राप्त भइरहेको सहयोग आगामी दिनमा वृद्धि हुने विश्वास व्यक्त गरेका छन् ।
उपप्रधानमन्त्री एवं अर्थमन्त्री पौडेलले भन्नुभयो, “वातावरण संरक्षण र संवर्द्धनमा नेपाल सदैव प्रतिबद्ध छ, कार्बन उत्सर्जन र वातावरण विनाशमा नगन्य भूमिका भए पनि जलवायु परिवर्तनका कारण बढी प्रभावित हुनुपरेको नेपालले युरोपेली युनियनलगायत विश्व समुदायबाट बढीभन्दा बढी सहयोगको अपेक्षा गरको छ ।”
सो अवसरमा नेपाल भ्रमणमा रहनुभएकी अन्तर्राष्ट्रिय साझेदारीका लागि युरोपेली युनियनकी आयुक्त युटा उर्पिलाइनेनल हरित उत्थानका लागि टिम युरोप कार्यक्रम शुभारम्भ गर्दै वातावरण संरक्षण, शिक्षा, स्वास्थ्य, जलविद्युत्, कृषि, सशक्तिकरणलगायत दिगो विकासका क्षेत्रमा नेपालमा लागू भएका कार्यक्रम सन्तोषजनक रहेको बताए ।
उनले सन् २०२१ देखि सुरु भएको हरित उत्थानका लागि टिम युरोप कार्यक्रमअन्तर्गत नेपाललाई २० करोड यूरो सहयोग उपलब्ध गराएकोमा सन् २०२४ मा सहयोग रकम वृद्धि गरी ३० करोड यूरो पु¥याइने जानकारी दिए ।सो अवसरमा फिनल्याण्ड, जर्मनी, फ्रान्स र युरोपेली युनियनको तर्फबाट संयुक्तरूपमा सञ्चालन भएको हरित उत्थानका लागि टिम युरोप कार्यक्रम नेपालभर लागू भए पनि सुदूरपश्चिम, कर्णाली र मधेश प्रदेशमा प्रभावकारी ढङ्गबाट सञ्चालन भएको जानकारी दिइएको थियो ।
