पोखरा, २३ माघ । पोखरा– २३ चापाकोटमा तेस्रो चापाकोट देउराली सामुदायिक होमस्टे सांस्कृतिक महोत्सव हुने भएको छ । चापाकोटको पर्यटन पर्वद्धन गर्न यही महिनाको २४–२८ गतेसम्म हुने महोत्सव गर्न लागिएको जानकारी यहाँ आयोजित पत्रकार सम्मेलनमा बताइएको छ । चापाकोट पर्यटन पर्वद्धन समितिद्धारा आयोजित महोत्सवमा स्थानीय मौलिकतामा विशेष जोड दिइने जानकारी समितिका अध्यक्ष भीम पराजुलीले दिए ।
पोखरा २३ का प्रकृतिक धार्मिक सामाजिक तथा सांस्कृतिक सम्पदाको प्रवद्र्धन गर्ने, पर्यटन पर्यावरण विकास गर्ने, स्वरोजगार निर्माण गरी स्थानीयको आय आर्जनमा वृद्धि गर्ने उद्देश्यका साथ महोत्सव आयोजना गर्न लागिएको चापाकोट पर्यटन प्रर्वद्धन समितिका सचिव घनश्याम पराजुलीले जानकारी दिए । महोत्सवमाभजन तथा नौमती बाजा प्रतियोगिता, रत्यौली, दुनाटपरी बुन्ने प्रतियोगिता, पुरुष तथा महिला दौड प्रतियोगिता, झाँकी तथा बालनृत्य प्रतियोगिता हुने बताइएको छ । महोत्सव २५ हजार दर्शक अवलोकन गर्ने अनुमान गरिएको छ ।
महोत्सव सफल पार्नको लागि आयोजकले विभिन्न समिति गठन गरेका छन् । महोत्सव सम्पन्न गर्न कार्यक्रम संंयोजक चेतनाथ देवकोटा, आर्थिक संयोजक इन्द्रप्रसाद पौडेल, सांस्कृतिक संयोजक जीवन कुमार सुनार, प्रचार प्रसार संयोजक घनश्याम पराजुली, अतिथि सत्कार संयोजक इन्दिरा पराजुली, खेल तथा मनोरोञ्जन संयोजक विकास राना र मञ्च व्यवस्थापन संयोजक नरबहादुर सुनार रहेका छन् ।
