काठमाडौं । समाज कल्याण परिषद् ले भृकुटीमण्डप क्षेत्रमा वर्षौंदेखि भाडा नतिर्ने सटलहरूमा कारबाही थालेको छ। परिषद्को निगरानीमा रहेका सटलमध्ये २० वटा इकाइमा तालाबन्दी गरिएको हो। परिषद्का अनुसार भाडा नतिर्ने ५६ सटलमध्ये पहिलो चरणमा २० वटामा ताला लगाइएको हो। उक्त कारबाही परिषद्का कर्मचारीले सुरक्षाकर्मीको सहयोगमा सञ्चालन गरेका थिए। तालाबन्दी गरिएका सटलहरूमा विभिन्न संघसंस्था तथा कार्यालय सञ्चालनमा रहेका थिए, जसमा रिपोर्टर्स क्लब समेत समावेश छ।
लामो समयदेखि भाडा नतिर्नेहरूको सूची तयार गरी कारबाही प्रक्रिया अघि बढाइएको परिषद्ले जनाएको छ। यस कदमलाई बक्यौता उठाउने प्रयासको रूपमा लिइएको भए पनि बाँकी सटलमा पनि यस्तै कदम चालिने संकेत गरिएको छ। सम्बन्धित निकायले पटक–पटक ताकेता गर्दा पनि भाडा नतिरेपछि अन्ततः कडा कदम चाल्नुपरेको परिषद्को भनाइ छ। यस कारबाहीले सार्वजनिक सम्पत्तिको प्रयोगमा जिम्मेवारी र अनुशासन कायम गर्न सन्देश दिने अपेक्षा गरिएको छ।
