काठमाडौं । नेपाली कम्युनिस्ट पार्टी (नेकपा) ले आगामी प्रतिनिधिसभा निर्वाचनलाई लक्षित गर्दै आफ्नो चुनावी प्रतिबद्धतापत्र सार्वजनिक गरेको छ। ‘सुशासन र रोजगारी, समाजवादको तयारी’ मूल नारासहित सार्वजनिक गरिएको प्रतिबद्धतापत्रमा देशको भौतिक पूर्वाधार विकासलाई प्राथमिकतामा राखिएको छ। नेकपाले लामो समयदेखि अलपत्र परेका राष्ट्रिय गौरवका आयोजना तथा नयाँ रणनीतिक योजनाहरूलाई तीव्र गतिमा सम्पन्न गर्ने प्रतिबद्धता जनाएको छ। घोषणापत्रमा पूर्व–पश्चिम रेलमार्ग निर्माण, काठमाडौं उपत्यकामा मेट्रोरेल र मोनोरेल सञ्चालन, साथै ठूला नदीहरूमा जल यातायातको पूर्वाधार विकास गर्ने योजना समेटिएको छ।
पार्टीका अनुसार पूर्व–पश्चिम राजमार्ग, हुलाकी मार्ग, मध्यपहाडी लोकमार्ग, काठमाडौं–निजगढ द्रुतमार्ग, काठमाडौं–हेटौंडा सुरुङमार्ग र उत्तर–दक्षिण कोरिडोरहरूको निर्माणलाई उच्च प्राथमिकतामा राखिनेछ। कोशी, त्रिशूली, कालीगण्डकी, कर्णाली र महाकाली करिडोरसँगै गड्डाचौकी–चिसापानी सडकखण्डलाई चार लेनमा विस्तार गर्ने योजना पनि घोषणापत्रमा उल्लेख छ। यातायात पूर्वाधारलाई विस्तार गर्दै काठमाडौंको बाहिरी चक्रपथ तथा अन्य प्रमुख सहरहरूमा चक्रपथ निर्माणलाई गति दिने, सबै स्थानीय तहका केन्द्रसम्म पक्की सडक पुर्याउने र हुलाकी सडकका बाँकी खण्ड सम्पन्न गर्ने लक्ष्य लिइएको छ। साथै पूर्व–पश्चिम हिमाली लोकमार्गको अध्ययन गरी प्रारम्भिक काम अघि बढाइने बताइएको छ।
रेल यातायाततर्फ केरुङ–काठमाडौं, काठमाडौं–पोखरा र काठमाडौं–लुम्बिनी रेलमार्गको निर्माण प्रक्रिया अघि बढाइनेछ भने अन्तरदेशीय नाका सञ्चालनका लागि कूटनीतिक पहल गरिने उल्लेख छ। निजगढ अन्तर्राष्ट्रिय विमानस्थल पाँच वर्षभित्र निर्माण सम्पन्न गर्ने, प्रयोगविहीन विमानस्थलको स्तरोन्नति वा वैकल्पिक उपयोग गर्ने योजना पनि समावेश गरिएको छ।
नेकपाको प्रतिबद्धतापत्रमा द्रुतमार्ग, लोकमार्ग र टनेल मार्ग विस्तार, प्रमुख सहरहरूमा मास ट्रान्जिट प्रणाली लागू गर्ने तथा ठूला नदीहरूमा जल यातायात सञ्चालन गर्ने दीर्घकालीन सोच प्रस्तुत गरिएको छ। पार्टीले यिनै पूर्वाधार विकासलाई आर्थिक वृद्धि, रोजगारी सिर्जना र समृद्धिको आधार मानेको जनाएको छ।
