पोखरा, १७ माघ । गण्डकी प्रदेश प्रहरी कार्यालयका प्रमुख प्रहरी नायव महानिरीक्षक बुद्धिराज गुरुङले घरेलु हिंसा सम्बन्धी मेलमिलाम गर्ने प्रक्रियामा पीडितका सम्पूर्ण कुरा प्रहरीले सुनिदिनुपर्ने बताउनुभएको छ ।
गण्डकी प्रदेश प्रहरी कार्यालय पोखराद्धारा मंगलबार यहाँ आयोजित जिल्ला तथा ईलाका प्रहरी कार्यालयका महिला बालबालिका तथा ज्येष्ठ नागरिक सेवा केन्द्रमा कार्यरत प्रहरी कर्मचारीहरुसंग “घरेलु हिंसाको उजूरी सुनुवाई तथा मेलमिलाप सीप विकास”सम्वन्धी एक दिने अन्तरक्रियामा डिआईजी गुरुङले त्यस्तो कुरा बताउनुभएको हो ।
घरेलु हिंसाका पीडितहरुलाई संरक्षण र बिवाद समाधानको स्थायी विकल्पहरु पहिचान गरी परामर्श प्रदान गर्न समेत गुरुङले सुझाव दिनुभएको छ । पीडितलाई न्याय दिन सक्यौं भने मात्र प्रहरी संगठन प्रति आम नागरिकको विश्वस रहने भनाई उहाँको छ ।
समाजमा विद्यमान घरेलु हिंसा न्यूनिकरणका लागि घरेलु हिंसा (कसूर र सजाय) ऐन २०६६ र नियमावली २०६७ को कार्यान्वयनमा एकरुपता र थप प्रभावकारीता ल्याउने उद्देश्यले उक्त अन्तरक्रिया कार्यक्रम गरिएको बताइएको छ । अन्तरक्रियाका सहभागीहरुलाई समाजमा भईरहेका विविध घरेलु हिंसा, उजुरीलिंदा प्रहरीले ध्यान दिनुपर्ने कुराहरु, अनुसन्धान, पीडितको संरक्षण, मेलमिलाप र संचार सीप तथा अभियोजनका विषयमा छलफल गरिएको थियो ।
उक्त कार्यक्रममा गण्डकी प्रदेश प्रहरी कार्यालय मातहतका प्रहरी कार्यलयका महिला बालबालिका ज्येष्ठ नागरिक सेवा केन्द्र र ठाडो उजूरी तथा सुनुवाई शाखामा कार्यरत ४० जना प्रहरी कर्मचारीको सहभागिता रहेको जनाइएको छ ।
