काठमाडौँ। नेपाली कांग्रेसका सभापति शेरबहादुर देउवाले पार्टीका उपसभापति र महामन्त्रीहरूसँग छलफल गर्ने भएका छन्। यसका लागि उनले पार्टीका शीर्ष पदाधिकारीहरूलाई आफ्नै निवासमा बोलाएका छन्।
सभापति देउवाले आज शनिबार बिहान ९ बजे दुई उपसभापति र दुई महामन्त्रीसँग छलफल गर्न लागेका हुन्। बैठकमा उपसभापतिद्वय पूर्णबहादुर खड्का र धनराज गुरुङ तथा महामन्त्रीद्वय गगन थापा र विश्वप्रकाश शर्मा सहभागी हुनेछन्।
मुख्यतः महाधिवेशनको कार्यतालिका र विधान मस्यौदा समिति गठनका विषयमा छलफल गर्न बैठक डाकिएको बताइएको छ। कांग्रेसले पुस २६ देखि २८ गतेसम्म महाधिवेशन गर्ने कार्यतालिका सार्वजनिक गरिसकेको छ। तर पुस १६ गते वडा अधिवेशन सम्पन्न गरी २६ गते नै केन्द्रीय महाधिवेशन गर्ने तालिका व्यवहारिक नभएको भन्दै नेताहरूले यसको कार्यान्वयनप्रति आशंका व्यक्त गर्दै आएका छन्।
यद्यपि निर्वाचन समिति र क्रियाशील सदस्यता छानबिन समिति गठन भइसके पनि विधान मस्यौदा समिति भने हालसम्म गठन हुन सकेको छैन। शनिबारको बैठकले यी संगठनात्मक जटिलताहरूलाई सम्बोधन गर्ने अपेक्षा गरिएको छ।
