काठमाडौं । चौथो कार्यकालका लागि तेस्रो राष्ट्रपति चयन गर्न निर्वाचन आयोगले आगामी २५ फागुनमा निर्वाचन तयारी गरिरहँदा चार दलबाट आठ आकांक्षी देखिएका छन् । प्रतिनिधि सभाको ठूलो दल नेपाली कांग्रेस, दोस्रो दल नेकपा (एमाले), तेस्रो दल नेकपा (माओवादी केन्द्र) र एमालेबाट अलग भएर संसदमा १० सिट जितेको नेकपा (एकीकृत समाजवादी) नयाँ राष्ट्रपतिका लागि आ–आफ्नो दाबी प्रस्तुत गरिरहेका हुन् ।
कांग्रेसबाट रामचन्द्र पौडेल र कृष्णप्रसाद सिटौलाको नाम चर्चामा छ । एमालेबाट पूर्व सभामुख समेत रहेका शुभाषचन्द्र नेम्वाङको नाम चर्चामा छ भने सत्ता साझेदार माओवादी केन्द्रले डा. बाबुराम भट्टराईलाई राष्ट्रपति बनाउने आन्तरिक तयारी तिब्र पारेको छ । यता एकीकृत समाजवादीबाट समेत सम्मानित नेता झलनाथ खनाल राष्ट्रपतिको दाउमा छन् । राष्ट्रपतिका आकांक्षीहरुले आफ्नै दलभित्र र बाहिरसमेत आन्तरिक छलफल तथा भेटघाट तीव्र बनाएका छन् । राष्ट्रपति निर्वाचनलाई लिएर एक अर्काप्रति सशंकित सत्तारूढ दल नेकपा (माओवादी केन्द्र) र नेकपा (एमाले) बीच दूरी बढ्दै गएको आँकलन समेत गरिएको छ ।
एमाले सरकार गठनअघि भएको ‘भद्र सहमति’ अनुसार एमालेले राष्ट्रपति पाउनुपर्ने दाबी गरिरहेको छ भने माओवादी केन्द्र राष्ट्रिय सहमतिको रटानमा छ । यसले कांग्रेस माओवादीको मत पाउनेमा हौसिएको छ । राष्ट्रपति निर्वाचनकै राजनीतिक समिकरणले सरकार सञ्चालनमा नयाँ समिकरण बन्न सक्ने, सत्ता गठबन्धनमा फाटो आउनेसम्मको पूर्वानुमान गर्न थालिएको छ ।
