रुसका राष्ट्रपति भ्लादिमिर पुटिन अहिले भारत भ्रमणमा छन् । दुई दिने भारत भ्रमणका क्रममा बिहीबार साँझ रुसी राष्ट्रपति पुटिन भारत आइपुगेका हुन् । पुटिनलाई भारतीय प्रधानमन्त्री नरेन्द्र मोदीले विमानस्थलमै पुगेर स्वागत गरेका थिए ।
भारत ओर्ले पछि भारतीय प्रधानमन्त्री मोदीले आयोजना गरेको स्वागत कार्यक्रममा मोदीले रुसी भाषामा लेखिएको गीताको प्रतिलिपि पुटिनलाई उपहार दिए । विमानस्थलमा औपचारिक स्वागतपछि प्रधानमन्त्री मोदी र राष्ट्रपति पुटिन एउटै कारमा प्रधानमन्त्री मोदीको निवास ७ लोक कल्याण मार्गमा गएका थिए।
युक्रेनसँगको युद्धपछि राष्ट्रपति पुटिनको यो पहिलो भारत भ्रमण हो। भ्रमणका क्रममा रूसी राष्ट्रपतिले प्रधानमन्त्री मोदीसँग २३ औं भारत–रूस वार्षिक शिखर सम्मेलनमा भाग लिने छन्।
फेब्रुअरी २०२२ मा युक्रेनमा युद्ध शुरू भएपछि रूसी राष्ट्रपति पुटिनको यो पहिलो आधिकारिक भारत भ्रमण हो। पुटिनको भारतको अन्तिम भ्रमण डिसेम्बर २०२१ मा भएको थियो।
रुसी राष्ट्रपतिको भारत भ्रमण यस्तो समयमा भएको हो जब भारत–अमेरिका सम्बन्ध विगत दुई दशकमा सायद सबैभन्दा खराब चरणबाट गुज्रिरहेको छ, किनकि वाशिंगटनले भारतीय सामानहरूमा ५० प्रतिशत भन्सार शुल्क लगाएको छ, जसमा नयाँ दिल्लीले रूसी कच्चा तेल खरिद गर्दा २५ प्रतिशत भन्सार शुल्क पनि समावेश छ।
भारतीय सञ्चार माध्यमहरूका अनुसार पुटिन र मोदीबीच शुक्रबार दुई महत्त्वपूर्ण भेटघाट हुने तय भएको छ ।
दुई नेताबीचको द्विपक्षीय बैठकमा भारत र रुसबीच २५ भन्दा बढी सम्झौतामा हस्ताक्षर हुने छ । यस्तै मोदी र पुटिनले साँझ व्यापारिक मञ्चलाई पनि सम्बोधन गर्नेछन् । पछि, राष्ट्रपति द्रौपदी मुर्मुले पुटिनको सम्मानमा राजकीय रात्रिभोज आयोजना गर्नेछन् ।
भ्रमणको क्रममा रुसले भारतलाई आफ्नो सु–५७ स्टिल्थ लडाकु जेट र त्यसको प्रविधि बिना कुनै शर्त दिन तयार रहेको जनाएको छ । रुसी सु–५७ जेटहरूलाई अमेरिकी एफ–३५ को काउन्टर मानिन्छ।
भारत र रूसको विशेष र विशेषाधिकार प्राप्त रणनीतिक साझेदारी छ। यस साझेदारीअन्तर्गत दुई देशहरूले लामो समयदेखि हतियार, प्रविधि र रक्षा सहयोग साझा गरेका छन् ।
भारतीय वायुसेनाले हाल लडाकु विमानहरूको अभावको सामना गरिरहेको छ ।
२३ औं भारत–रूस शिखर सम्मेलनले २०३० सम्ममा दुई देशबीचको व्यापार १०० अर्ब डलर पुर्याउने लक्ष्य राखेको छ। यस मञ्चले ऊर्जा, लगानी, प्रविधि र उद्योग जस्ता विभिन्न क्षेत्रहरूमा नयाँ साझेदारीको बारेमा छलफल गर्नेछ।
