काठमाडौं ।आउँदो फागुन २१ गते हुने प्रतिनिधिसभा चुनावका लागि मतदाता नामावलीमा नाम दर्ता गर्ने आज अन्तिम दिन हो। यसअघि कात्तिक मसान्तसम्म समय सीमा तोकिएकोमा निर्वाचन आयोगले समय थप गर्दै आजसम्म नाम दर्ता गर्न दिइएको हो।
राष्ट्रिय परिचयपत्र नम्बर भएका नागरिकले अनलाइनमार्फतै नाम दर्ता गर्न सक्ने व्यवस्था आयोगले मिलाएको छ। जैविक तथ्याङ्क (बायोमेट्रिक) राष्ट्रिय परिचयपत्रसँग जोडिएपछि नाम दर्ता हुने प्रणाली लागू गरिएको छ। आयोगका अनुसार अहिलेसम्म सात लाखभन्दा धेरै नयाँ मतदाता थपिएका छन्।
यसैबीच, आयोगले मतदाता नामावलीमा भएका त्रुटि सच्याउन मंसिर २१ देखि २७ गतेसम्म समय तोकेको छ। नामावलीमा त्रुटि परेमा सच्याउन, झुटा विवरणमा आधारित नाम समावेश भएको भए उजुरी दिन, एकभन्दा बढी स्थानमा नाम दर्ता भएको भए एक ठाउँमा मात्र कायम गर्न निवेदन दिन तथा ज्यान गएका वा नागरिकता त्याग गरेका व्यक्तिको नाम हटाउन निवेदन दिन सकिनेछ।
यसका लागि आयोगको वेबसाइट, प्रदेश निर्वाचन कार्यालय वा जिल्ला निर्वाचन कार्यालयमार्फत निवेदन, उजुरी वा सूचना दिन सकिने व्यवस्था गरिएको छ। प्राप्त गुनासा र उजुरीको छानबिनपछि पुस १५ गते अन्तिम मतदाता नामावली सम्बन्धित निर्वाचन कार्यालय तथा वडा कार्यालयमा प्रकाशित गरिने आयोगले जनाएको छ।
