काठमाडौं । राष्ट्रिय स्वतन्त्र पार्टी (रास्वपा) मा सन्नाटा छाएको छ । सर्वोच्च अदालतको फैसलाबाट उपप्रधान तथा गृहमन्त्री रवि लामिछानेले पार्टीको सभापति पद पनि गुमाएपछि रास्वपा अहिलेलाई नेतृत्वविहीन बनेको छ । पार्टीका नेताहरु स्तब्ध अवस्थामा छन् ।
सर्वोच्च अदालतले रविसँग भएको नेपाली नागरिकतालाई अमान्य ठहर गर्दै उनको सांसद पद नरहने फैसला सुनाएको छ । फैसलामा उनको पार्टीगत हैसियतका विषयमा कुनै टिप्पणी गरिएको छैन । तर, पार्टीको सभापति बन्न नेपाली नागरिक हुनैपर्ने प्रावधान भएकाले रवि त्यस निम्ति अयोग्य बनेका हुन् । रविले सर्वोच्च अदालतको फैसला स्वीकार गर्ने र अदालतभन्दा माथि कोही नरहेको बताइसकेका छन् ।
रास्वपामा रविको एकल कमाण्डजस्तै थिए । रविले सभापति पद पनि गुमाएकाले पार्टीको बैठक बोलाइएको छैन । तर, पार्टी नेताहरु आपसी छलफलमा छन् । आन्तिरक छलफलमा डोरप्रसाद अर्याल कार्यकारी सभापति बनाउने कुरा चलेको छ ।
लामिछानेको सभापति पद गएसँगै रास्वपाले अर्याललाई कार्यकारी सभापति बनाउने तयारी गरेको हो । पार्टीको बैठक बसेर अर्याललाई कार्यकारी सभापति बनाउने भन्ने विषयमा छलफल हुने रास्वपा केन्द्रीय सदस्य गणेश कार्कीले जनकारी दिएका छन् ।
