काठमाडौं । बलिउडको इतिहासमा धेरै चर्चित जोडीहरू रहे, तर सलमान खान र ऐश्वर्या रायको प्रेम र ब्रेकअप कहानी आज पनि धेरैलाई चासोको विषय रहँदै आएको छ।
हालैको एक अन्तर्वार्तामा, चर्चित विज्ञापन निर्माता प्रह्लाद कक्कडले उनीहरूको सम्बन्धको गहिरो पाटो उजागर गरेका छन्। कक्कडका अनुसार, सलमान खान ऐश्वर्याप्रति यति ‘पागल’ थिए कि उनी ब्रेकअपपछि भित्तामा टाउको ठोक्काउनेसम्मको अवस्था पुगे।
प्रह्लाद कक्कडले विक्की लालवानीसँगको अन्तर्वार्तामा खुलासा गरे, “उनी (सलमान) ऐश्वर्यासँग एकदम शारीरिक र पागल थिए। तपाईं त्यस्तो व्यवहार कसरी सहन सक्नुहुन्छ ?” कक्कडले भने अनुसार, सलमान आफैंलाई चोट पुर्याउने व्यवहार गर्थे। उनले थपे, “उनी भवनको प्रवेशद्वारमा टाउको भित्तामा ठोक्थे। सम्बन्ध समाप्त भइसकेको थियो, तर त्यो सम्बन्ध अन्त्य हुनु सबैको लागि राहतजस्तै बन्यो, उनका आमाबाबु, ऐश्वर्या, अनि सम्पूर्ण संसारका लागि।”
कक्कडले बताए अनुसार, ऐश्वर्या राय ब्रेकअपबाटभन्दा पनि, इन्डस्ट्रीको व्यवहारबाट बढी आहत भइन्। “उनी यो कुरामा दुखी थिइन् कि सबैले सलमानलाई समर्थन गरे, आफूलाई होइन। सत्य त उनको पक्षमा थियो,” कक्कडले भने। उनका अनुसार, यही कारणले ऐश्वर्याले उद्योगमा विश्वास गुमाइन् र आफूलाई अलग राख्न थालिन्। “त्यहीँबाट उनको फिल्म उद्योगप्रतिको प्रतिबद्धता टुट्यो,” कक्कडको भनाइ थियो।
सलमान र ऐश्वर्याको प्रेम सम्बन्ध १९९९ को फिल्म हम दिल दे चुके सनम को सेटबाट सुरु भएको मानिन्छ। ती बेला बलिउडकै सबैभन्दा ग्ल्यामरस जोडीको रूपमा हेरिएको उनीहरूको सम्बन्ध केही वर्षमै टुट्यो। २००२ मा दुबै अलग भए। आज ऐश्वर्या राय अभिषेक बच्चनसँग विवाहित जीवन बिताइरहेकी छन् र उनीहरूकी एक छोरी आराध्या छन्। उता, सलमान खान अझै पनि अविवाहित छन्।
