धनगढी।डडेल्धुरामा जिप दुर्घटना हुँदा चार जनाको घटनास्थलमै मृत्यु भएको छ। नवदुर्गा गाउँपालिका–५ को चौडको कच्ची सडक खण्डमा बिहीबार बिहान से १ ज ७३८ नम्बरको जिप दुर्घटना भएको जिल्ला प्रहरी कार्यालय डडेल्धुराले जनाएको छ।
निमित्त प्रमुख प्रहरी निरीक्षक डम्बर विष्टका अनुसार दुर्घटनामा परेका जिप डडेल्धुरा सदरमुकामतर्फ आइरहेको थियो र सडकबाट करिब पाँच सय मिटर तल जंगलमा खसेको थियो। घटनास्थलमा प्रहरीले चार जनाको शव फेला पारेको छ। मृतकको सनाखत हुन सकेको छैन भने दुर्घटनाको कारण पत्ता लगाउन अनुसन्धान जारी छ।
दुर्घटनामा कम्तीमा सात जना घाइते भएका छन्। घाइतेहरूको उद्धार कार्य जारी रहेको छ र उनीहरूलाई डडेल्धुरा अस्पतालमा उपचारका लागि लैजाने तयारी भइरहेको प्रहरीले जनाएको छ।
घटना करिब सवा नौ बजेतिर भएको अनुमान गरिएको छ।
