सुर्खेत। कर्णाली प्रदेशमा ४२ प्रतिशत मानिस चिन्ता र २३ प्रतिशत मानिस निराशाका रोगी भएको पाइएको छ । त्यस्तै, यहाँ ११.७ प्रतिशत नागरिक कुनै न कुनै मानसिक रोगबाट प्रभावित छन् ।
स्विस सरकार र मानसिक स्वास्थ्य तथा परामर्श केन्द्र (सिएमसी नेपाल)को सहयोगमा सामाजिक विकास मन्त्रालयले सुर्खेतमा बुधबार आयोजना गरेको ‘मानसिक स्वास्थ्य तथा मनोसामाजिक रणनीति कार्ययोजना २०७९–२०८७ को मध्यकालीन समीक्षा’ कार्यक्रममा यो तथ्य सार्वजनिक भएको हो ।
सिएमसी नेपालका निर्देशक डा. पशुपति महतका अनुसार कर्णालीमा मानसिक स्वास्थ्य समस्या बढ्दो अवस्थामा छ र यसको रोकथामका लागि सबै तहका सरकारले लगानी बढाउन आवश्यक छ ।
सामाजिक विकासमन्त्री घनश्याम भण्डारीले मानसिक रोग लुकाउने प्रवृत्ति चुनौती रहेको उल्लेख गर्दै समयमै सचेत हुनुपर्ने बताए । उनले कर्णालीले सात प्रदेशमध्ये पहिलोपटक मानसिक स्वास्थ्य तथा मनोसामाजिक रणनीति निर्माण गरी कार्यान्वयनमा ल्याएको जानकारी दिए ।
मन्त्रालयका सचिव धोलकराज ढकालले मानसिक स्वास्थ्यलाई आधारभूत अधिकारको रूपमा सुनिश्चित गर्नुपर्ने बताए । कार्यक्रममा मानसिक रोग विशेषज्ञ डा. सुशील समदर्शी, मानव अधिकार आयोग कर्णाली प्रमुख रमेश थापा, स्वास्थ्य अधिकारी किरणकुमार शर्मा लगायतले कार्ययोजनाको प्रगति, समस्या र आगामी कार्यदिशाबारे प्रस्तुति दिएका थिए ।
सिएमसी नेपालका नीति प्रमुख हिमाल गैरेका अनुसार विशेषगरी बसाइँसराइ र वैदेशिक रोजगारीबाट फर्केका जिल्लाका नागरिकमा मानसिक स्वास्थ्य समस्या अझै गम्भीर देखिएको छ ।
