काठमाडौं – विश्वभरका मानिसहरूले दैनिक रूपमा व्हाट्सएप प्रयोग गर्छन्। विश्वकै सबैभन्दा लोकप्रिय इन्स्ट्यान्ट मेसेजिङ एपमा प्रयोगकर्ता संख्या बढ्दै जाँदा साइबर अपराधीहरूको पनि नजर यसमा पुगेको छ। फिसिङ लिङ्कहरू, सिम-स्वैप आक्रमणजस्ता नयाँ–नयाँ प्रविधिहरूले प्रयोगकर्ताको खातामा जोखिम बढाएको छ।
विशेषज्ञहरूले सबै व्हाट्सएप प्रयोगकर्तालाई आफ्नो खाताको सुरक्षा कडाइका साथ जाँच गर्न र केही महत्वपूर्ण सेटिङहरू सक्रिय गर्न सुझाव दिएका छन्। दुई-चरण प्रमाणीकरण, बायोमेट्रिक लक, गायब हुने सन्देशहरू, ब्याकअप इन्क्रिप्शन र प्रोफाइल गोपनीयता नियन्त्रणजस्ता सुविधा प्रयोगकर्ताको खाता सुरक्षित बनाउन निकै उपयोगी सावित भएका छन्।
दुई-चरण प्रमाणीकरण सेट गर्दा नयाँ उपकरणबाट लगइन गर्न छ-अङ्कको पिन समेत आवश्यक पर्छ जसले ह्याकरहरूको पहुँच रोक्छ। साथै फिंगरप्रिन्ट वा फेस आईडी जस्ता बायोमेट्रिक सुरक्षा अपनाउनाले फोन चोरी भए पनि अनधिकृत पहुँचबाट बच्न सकिन्छ।
गोपनीय सन्देशहरूलाई सुरक्षित राख्न व्हाट्सएपले ‘Disappearing Messages’ सुविधा पनि उपलब्ध गराएको छ जसले सन्देशलाई २४ घण्टा, ७ दिन वा ९० दिनपछि आफैं मेटाउँछ। यसले फोनमा संवेदनशील जानकारी लामो समयसम्म नबस्ने सुनिश्चित गर्छ।
यसबाहेक, क्लाउडमा सेभ गरिने ब्याकअपमा इन्क्रिप्शन अन गर्नुपर्छ, जसले बाहिरी व्यक्तिहरूले पुराना सन्देशहरू पहुँच गर्नबाट रोक्छ। अन्तमा, प्रोफाइल गोपनीयता सेटिङहरूलाई चुस्त राख्नुपर्छ जसले प्रोफाइल फोटो, अन्तिम देखिएको समय र स्टाटस कस्को लागि देखिने हो निर्धारण गर्छ।
विशेषज्ञहरूले भनेका छन्, “साइबर अपराधीहरूले निरन्तर नयाँ तरिकाहरू अपनाइरहेका छन्, तर यी सुरक्षा उपायहरूले प्रयोगकर्ताको गोपनीयता र डेटा संरक्षणमा ठूलो मद्दत पुग्छ।”
यसैले, डिजिटल सुरक्षा सुनिश्चित गर्न व्हाट्सएपका यी सबै सुरक्षा सेटिङहरू तुरुन्तै सक्रिय गर्न सबै प्रयोगकर्तालाई आग्रह गरिएको छ।
