काठमाडौं, साउन १७ – भारत सरकारले संयुक्त राष्ट्रसंघको विश्व खाद्य कार्यक्रम (WFP) सँगको सहकार्यमा नेपालमा पौष्टिक तत्व स्तरोन्नति गरिएको चामल तथा आपूर्ति श्रृंखला व्यवस्थापन परियोजनाको शुभारम्भ गरेको छ। उक्त परियोजना भारत–संयुक्त राष्ट्रसंघ वैश्विक क्षमता निर्माण पहल अन्तर्गत सुरु गरिएको हो, जसको उद्देश्य नेपालमा खाद्य आपूर्ति प्रणालीलाई अझ प्रभावकारी र सुदृढ बनाउनु हो।
नेपालमा सुरु भएको यस पहलमार्फत भारतको सफल सार्वजनिक वितरण प्रणाली (PDS) मा प्रयोग भएका नवीनतम अभ्यासहरू, जस्तै लाभार्थी व्यवस्थापन, भण्डारण तथा वितरण मोडेल, निगरानी तथा मूल्याङ्कन प्रणाली, र गुनासो निवारण संयन्त्रहरूबारे नेपाली सरोकारवालाहरूलाई ज्ञान हस्तान्तरण गरिनेछ।
१२ महिनाको अवधिका लागि तय गरिएको यो परियोजना तीन चरणमा कार्यान्वयन गरिनेछ। पहिलो चरणमा आवश्यकता मूल्याङ्कन र सरोकारवालाको संलग्नता सुनिश्चित गरिनेछ, दोस्रो चरणमा प्रयोगात्मक अभ्यास र अध्ययन भ्रमण हुने छ भने तेस्रो चरण कार्य योजनाको विकासमा केन्द्रित हुनेछ। परियोजनाको प्रशिक्षण भाग भारत सरकारको भारतीय प्राविधिक तथा आर्थिक सहयोग (ITEC) कार्यक्रमअन्तर्गत सञ्चालन गरिनेछ। सन् २००१ यता ३,००० भन्दा बढी नेपाली अधिकारीहरूले ITEC कार्यक्रमअन्तर्गत भारतमा तालिम लिइसकेका छन्।
सन् २०२३ को सेप्टेम्बरमा संयुक्त राष्ट्रसंघ महासभाको ७८औं सत्रको अवसरमा भारतले घोषणा गरेको भारत–संयुक्त राष्ट्रसंघ वैश्विक क्षमता निर्माण पहल अन्तर्गत नेपालमा कार्यान्वयन हुने चार परियोजनामध्ये यो एक प्रमुख परियोजना हो।
यस पहलले भारत र नेपालबीचको दीर्घकालीन विकास साझेदारीलाई थप सुदृढ बनाउने विश्वास गरिएको छ। साथै, यो परियोजना दक्षिण-दक्षिण सहकार्य र दिगो विकास लक्ष्य (SDGs) प्राप्तिमा दुवै देशको साझा प्रतिबद्धताको प्रतिविम्ब हो
