पोखरा, ३ माघ । पोखराको सेती खोँचमा आइतबार बिहान जहाज दुर्घटनामा परी गाउँकै पहिलो पाइलट एवं प्रशिक्षक कमल केसीको निधन प्रति रुपा गाउँपालिकाले दुःख व्यक्त गरेको छ ।
कास्कीको पूर्वी रुपा गाउँपालिकाका अध्यक्ष नवराज ओझाले मंगलबार केसीप्रति श्रद्धाञ्जली तथा परिवारप्रति समवेदना प्रकट गर्दै दुःख व्यक्त गर्नुभएको हो । रुपा गाउँपालिका– ३ स्थायी निवासी बुवा वीरेन्द्र केसी र आमा मीना केसीका ज्येष्ठ सुपुत्र ५९ वर्षीय क्याप्टेन कमल केसीको निधनले गाउँनै शोकमा डुबेको अध्यक्ष ओझाले बताउनुभयो ।
अमेरिकाबाट पाइलट विषयमा अध्ययन गरी वि.स. २०४६ मा नेपाल बायुसेवाबाट करियर शुरु गरी भारतको बैंगलोर स्थित इन्डियन एयरलाइन्स र पछिल्लो समय यति एयरलायन्समा आवद्ध क्याप्टेन केसीलेको निधनले रुपमा गाउँपालिकालाई अपुरणीय श्रति पुगेको जनाइएको छ ।
केसीलाई रुपा गाउँपालिकाको चौथो स्थापना दिवसको अवसरमा रुपा रत्न सम्मान २०७८ बाट समेत केसीलाई सम्मान गरिएको जानकारी अध्यक्ष ओझाले दिनुभयो । आज मंगलबार गाउँपालिकाको वैठकले मंगलबार साँझ रुपा गाउँपालिकाका सबै वडा कार्यालयहरुमा ७२ वटा दीप प्रज्वलन गरी राष्ट्रिय झण्डा तीन दिनसम्म झुकाउने निर्णय गरेको छ । साथै बैठकले केसीको नाउँमा अर्धकदको शालिकसहितको पार्क निर्माण गरी शिलालेखमा जहाजमा दुर्घटना भएका ७२ जनाको नाम लेखिने निर्णय गरेको छ ।
साथै बैठकले पाइलट केसीका बारेमा स्थानीय पाठ्यपुसतकमा समावेस गराउने निर्णय समेत गवरेको छ । आइतबार सेती खोँचमा जहाज दुर्घटनामा परेका मध्ये ६९ जनाको शव फेला परेको छ भने ३ जना अझै बेपत्ता छन् । शव पहिचान भएका २४ जनाको शव पोखरा स्वास्थ्य विज्ञान प्रतिष्ठान पोखराबाट आफन्तलाई बुझाइएको छ भने पहिचान नभएका मानिसको शव मंगलबार हेलिकप्टरबाट काठमाण्डौ लगिएको छ ।
