रूसले युक्रेनको राजधानी किएभमा गरेको आक्रमणमा कम्तिमा चार जनाको मृत्यु भएको युक्रेनी अधिकारीहरूले शुक्रबार बताएका छन् । आक्रमणमा २० जना घाइते भएको जनाइएको छ ।
रूसले रातभर युक्रेनमा ड्रोन आक्रमण गरेको अधिकारीहरूले बताएका छन् ।
“पटक पटक रूसी युएभी र ब्यालेस्टिक मिसाइलको सिकार भएका किएभका उद्धारकर्ताहरूले सहरबाट प्रतिक्रिया दिइरहेको छन्,” युक्रेनको आपतकालीन सेवाले टेलिग्राममार्फत दिएको जानकारीमा उल्लेख छ ।
किएभका नगर प्रमख भिटाली क्लिट्स्कोले राजधानीमा भएको घटनाको पुष्टि गर्दै घाइते मध्ये १६ जनालाई अस्पतालमा भर्ना गरिएको बताउनुभएको छ ।
आक्रमणका कारण आवासीय भवन, पूर्वाधारलगायत संरचना क्षतिग्रस्त भएका छन् भने ठाउँठाउँमा आगलागी भएको छ ।
युक्रेनको राष्ट्रिय रेलवे सञ्चालकले रेल सेवा ढिलाइ हुने चेतावनी दिँदै आक्रमणले किएभ क्षेत्रमा रेल मार्गहरू क्षतिग्रस्त भएको उल्लेख गरेको छ ।
पश्चिमी युक्रेनको लुत्स्क सहर र टेर्नोपिल क्षेत्रमा पनि थुप्रै आक्रमणहरू भएका छन् ।
“आज, शत्रुले हाम्रो क्षेत्रमा अहिलेसम्मको सबैभन्दा ठुलो हवाई आक्रमण गरेको छ । त्यहाँ धेरै आक्रमणहरू भएका छन्,” टेर्नोपिलका क्षेत्रीय सैन्य प्रशासन प्रमुख व्याचेस्लाव नेगोडाले भन्नुभयो ।
आगलागी नियन्त्रण तथा क्षति र अन्य परिणामहरूको मूल्याङ्कन गर्न थालेको र लुत्स्कमा भएको आक्रमणमा पाँच जना घाइते भएको उहाँले बताउनुभएको छ ।
धेरै निजी घरहरू र शैक्षिक संस्थाहरू क्षतिग्रस्त भएको सहरका नगरप्रमुख इगोर पोलिस्चुकले टेलिग्राममार्फत जानकारी गराउनुभएको छ ।
पश्चिमी सहर खमेल्नेत्स्कीमा भवन र सवारी साधन पनि क्षतिग्रस्त भएको पनि उक्त क्षेत्रका गभर्नरले बताउनुभयो ।
रूसी राष्ट्रपति भ्लादिमिर पुटिनले रूसमा किएभले हालै गरेको ड्रोन आक्रमणको बदला लिने वाचा गर्नुभएको छ ।
यसैबीच, पश्चिमी तुला क्षेत्रमा रुसमा भएको युक्रेनी हमलामा तिन जना घाइते भएका छन् ।
रुसी हवाई रक्षा बलले मस्कोलाई लक्षित गरेको ड्रोनलाई गोली हानेर खसालेको किएभका नगरप्रमुखले बताउनुभएको छ ।
