काठमाडौं । अनपेक्षित रूपमा सरकारको नेतृत्व गर्ने अवसर र जिम्मेवारीबाट बाहिरिएको नेपाली कांग्रेसमा अनेक छटपटी चलिरहेको छ । कांग्रेसको हरेक गतिविधि संशयपूर्ण देखिन्छ ।
आजभोलि नै कुनै न कुनै रूपमा सत्ताको भागबन्डामा सामेल हुन कांग्रेसले अनेक गतिविधि गरिरहेको छ । यसै मेसोमा केही समय अगाडि मात्र धोका दिएका प्रचण्डलाई प्रधानमन्त्रीको रूपमा विश्वासको मत दिएको छ ।
नेकपा एमाले र नेकपा माओवादी केन्द्र सहितका दल मिलेर सरकार बनिसकेपछि कांग्रेस स्वतः प्रमुख प्रतिपक्षी दल बनेको हो । तर, प्रधानमन्त्रीलाई विश्वासको मत दिएर कांग्रेसले आफूलाई सत्तापक्षीय लाइनमा उभ्याएको छ ।
प्रधानमन्त्रीलाई विश्वासको मत दिने निर्णयसँगै कांग्रेसले सत्ताका लागि नयाँ खेल सुरु गरेको प्रष्ट भयो । लगत्तै, राष्ट्रपति र सभामुख दाबी गर्दै सत्तारूढ दल नेकपा माओवादी केन्द्रसँग राष्ट्रपति निर्वाचनमा सहयोगको अपेक्षा राख्यो ।
कांग्रेसले चाहे जसरी राष्ट्रपति पाउन सहज भने छैन । तर, कांग्रेसले अनेक चाल चालिरहेको बुझ्न कठिन हुँदैन । मुख्यगरी कांग्रेसले एमाले–माओवादी मतभेदलाई राष्ट्रपति निर्वाचनमा उपयोग गर्ने नीति अघि सारेको छ ।
एमाले–माओवादी गठबन्धनको सरकार बनाउन र कांग्रेसलाई पाखा पार्न वाह्य शक्तिको भूमिका रहेको चर्चा चलेको थियो । र, कांग्रेसको आन्तरिक बुझाइ पनि त्यस्तै रहेको बुझिन्छ । तर, त्यसैले कांग्रेस वाह्य शक्तिलाई सन्तुलनमा राख्न लागिपरेको समेत छनक पाइन्छ ।
सभामुख र राष्ट्रपतिको निर्वाचन निकट आइसक्यो । सँगै, कांग्रेसले आन्तरिक तथा वाह्य शक्तिसन्तुलनका लागि गतिविधि बढाएको छ । यति नै बेला कांग्रेस उपसभापति विमलेन्द्र निधि र नेता तथा कांग्रेस सभापति शेरबहादुर देउवापत्नी आरजु राणा देउवा भारत पुगेका छन् ।
निधि र देउवाको भारत भ्रमण औपचारिक–अनौपचारिक वा व्यक्तिगत भन्ने केही खुलाइएको छैन । उनीहरू भारत पुगेको भए पनि कुनै सार्वजनिक वा निजी गतिविधिमा संलग्न भएको केही सार्वजनिक भएको छैन ।
मन्त्रिपरिषद्ले पूर्णता पाएको छैन । संवैधानिक निकायहरूको निर्वाचन समेत सम्पन्न भएको छैन । यस्तो समयमा कांग्रेसले आन्तरिक गतिविधि बढाउनु, निधि र देउवा गोप्य जसरी नै भारतमा भ्रमणमा रहनुलाई संशयका रूपमा हेर्ने गरिएको छ ।
