जुम्ला। यही वैशाख १७ गते राति परेको भीषण असिनापानीले जुम्लाको स्याउखेतीमा ठूलो क्षति पुर्याएको छ। गुठीचौर गाउँपालिकाको पूर्वी क्षेत्रमा असिनाले सबैभन्दा बढी स्याउका बिरुवामा क्षति पुर्याएको स्थानीय किसानहरूले बताएका छन्। स्याउमा चिचिला लाग्ने महत्वपूर्ण समयमा परेको असिनापानीले उत्पादनमा गम्भीर असर पार्ने गुठीचौर–३ का किसान दीपक बुढाले जानकारी दिए।
जिल्लामा ४ हजार २५० हेक्टर क्षेत्रफलमा स्याउखेती हुँदै आएको छ र १६ हजार घरपरिवार यसैमा निर्भर छन्। कृषि विकास कार्यालयका निमित्त प्रमुख रामभक्त अधिकारीका अनुसार गत वर्ष मात्र जुम्लामा ६१ करोड ४१ लाख रुपैयाँ बराबरको स्याउ बिक्री भएको थियो। कार्यालयले स्थानीय तहका कृषि शाखाहरूको समन्वयमा असिनाले स्याउमा पुर्याएको क्षतिको विस्तृत तथ्याङ्क संकलन गरिरहेको जनाएको छ।
असिनापानीले करिब १० लाख रुपैयाँ बराबरको स्याउमा क्षति पुगेको प्रारम्भिक अनुमान गरिएको छ। किसान नुर्बु लामाले भने, “गत वर्ष स्याउबाट आठ लाख रुपैयाँ आम्दानी भयो, यस वर्ष पनि स्याउ राम्रो फल्ने बेला असिनाले सबै सखाप पार्यो। हाम्रो वडाका नौ घरपरिवारको स्याउखेतीमा असिनाले ठूलो क्षति गरेको छ।” मुख्य आम्दानीको स्रोतको रूपमा रहेको स्याउमा चिचिला लाग्ने बेला पातसमेत झार्ने गरी असिना परेपछि स्याउका रूखहरू टाकुला जस्ता देखिन थालेको किसान लामाको भनाइ छ।
असिनाले स्याउ मात्र नभई जौँ, गहुँ, मकै र भोटे जिरालगायत अन्य बालीमा पनि क्षति पुर्याएको छ। गत वर्ष शिखर इन्स्योरेन्सले बीमा गरिदिएकाले किसानहरूलाई केही राहत मिलेको थियो, तर यो वर्ष बीमा नहुँदा स्याउ किसानहरू ठूलो मर्कामा परेको लामाले बताए। गुठीचौर–२ मुडरीगाउँमा पनि असिनापानीले स्याउमा क्षति पुर्याएको वडाध्यक्ष दीपबहादुर ऐडीले पुष्टि गरेका छन्। कोल्ते, गुठीगाउँ र मुडुरीगाउँ लगायत करिब ५५० घरपरिवारले लगाएको गहुँ, जौँ, ओखर, स्याउ र बर्खे फलफूलमा क्षति पुगेको छ। जौँ र गहुँबाली भित्र्याउने समयमा परेको असिनापानीले किसानहरू थप चिन्तित भएका छन्।
