काठमाडौँ । सत्ता साझेदार दलको बैठक बस्दैछ । बुधबार प्रधानमन्त्री पुष्पकमल दाहाल ‘प्रचण्ड’ र एमाले अध्यक्ष केपी शर्मा ओलीबीचको भेटवार्तापछि आज सत्ता साझेदार दलको बैठक बोलाइएको हो ।
ओली निवास बालकोटमा भएको भेटवार्तामा दुई नेताबीच मन्त्रिपरिषद्लाई पूर्णता दिने विषयमा छलफल भएको थियो । आजको सत्ता साझेदार दलबीचको बैठकले मन्त्रिपरिषद विस्तारमा सहमति गर्ने प्रधानमन्त्रीको सचिवालयले जनाएको छ ।
प्रधानमन्त्रीले संसद् बैठकबाट गत मंगलबार विश्वासको मत लिएपछि मन्त्रिपरिषद् विस्तारको तयारीमा लागेका हुन् । बैठकमा मन्त्रिपरिषदलाई पूर्णता दिएर अघि बढ्ने विषयमा छलफल हुने प्रधानमन्त्रीका स्वकीय सचिव रमेश मल्लले बताए ।
प्रधानमन्त्री प्रचण्ड मन्त्रिपरिषदलाई तत्काल पूर्णता दिने तयारी गरेको र सहमतिका लागि सत्ता साझेदार दलबीच छलफल छ । आज बैठकबाट सहमति बनेमा भोलिसम्म मन्त्रिपरिषद विस्तार हुने बताइएको छ ।
प्रधानमन्त्री प्रचण्डले पुस ११ गते पद तथा गोपनीयताको शपथ लिएका थिए । अहिले उनीसँग सरकारमा ८ सदस्यीय मन्त्रिपरिषद रहेको छ । संविधानले बढीमा २५ सदस्यीय मन्त्रिपरिषद गठन गर्न सक्ने व्यवस्था गरेकाले साझेदार दलबीचको सहमति पछि मन्त्रिपरिषदलाई पूर्णता दिने प्रधानमन्त्री प्रचण्डको आन्तरिक तयारी छ ।
