काठमाडौँ – नाट्टा बाँकेको पहलमा नेपालगञ्जबाट सिधा ‘माउन्टेन फ्लाइट’का रुपमा चीनको कैलाश मानसरोवर उडानको तयारी भइरहेको छ । नेपालगञ्जमा आउने भारतीय पर्यटकका लागि ‘एरियल भ्यु’ देखाउन कैलाश मानसरोवर उडान भर्ने तयारी भइरहेको नाट्टा बाँके च्याप्टरका अध्यक्ष श्रीराम सिग्देलले जानकारी दिए ।
उनका अनुसार बुद्ध एयरसँग यसबारे कुराकानी भइरहेको र नेपालगञ्जमा माघ १४ गतेदेखि सुरु हुने ‘वेष्टर्न ट्राभल मार्ट’मा कैलाश मानसरोवर उडान भर्ने तयारी भइरहेको हो । मार्टमा उद्घाटन हुने भएपनि त्यसपछि साप्ताहिक रुपमा कर्णाली र सुदूरपश्चिमका सुन्दर पर्यटकीय क्षेत्रको ‘एरियल भ्यु’का साथै माउन्टेन फ्लाइटका रुपमा उडान भर्ने तयारी सुरु गरिएको सिग्देलले बताए ।
‘अहिले प्रारम्भिक रुपमा छलफल गर्दा सबैबाट सकारात्मक प्रतिक्रिया आएको छ । रारा, फोक्सुन्डो, मानसरोवरको साथै कर्णालीको काञ्जिरोवा हिमाल, सिस्ने हिमाल, चंखेली हिमाल लगायतको दृश्य हेर्नका लागि माउन्टेन फ्लाइट गर्छौँ’ उनले भने ।
भारतीय पर्यटकलाई लक्षित गरेर माउन्टेन फ्लाइट गर्दा कर्णाली र सुदूरपश्चिमको पर्यटनका लागि धेरै प्रवद्र्धनको काम हुने पनि उनको भनाई छ । मार्टमा उद्घाटन गरेर साप्ताहिक उडान गर्दा नेपालगञ्जमा आउने भारतीय पर्यटकलाई ठूलो सहयोग पुग्ने पनि उनको भनाई छ ।
यसबारेमा थप छलफल भइरहेको र चाँडै नतिजा आउने उनको भनाई छ । अहिले काठमाडौँ र पोखराबाट माउन्टेन फ्लाइट भइरहेका छन् । तर पश्चिम नेपालमा भने छैन । काठमाडौँबाट सर्वोच्च शिखर सगरमाथादेखि पूर्वी नेपालका हिमालको दृश्यवालोकन गराइने गरिन्छ ।
यस्तै पोखराबाट अन्नपूर्ण लगायत हिमालको लागि माउन्टेन फ्लाइट गरिन्छ । तर पश्चिम नेपालमा माउन्टेन फ्लाइट छैन । जसकारण पश्चिम नेपालमा रहेका अपी, सैपाल, चंखेली हिमाल, सिस्ने हिमाल, काञ्जिरोवा हिमाल ओझेल पर्दै आएका छन् ।
नाट्टा बाँकेले यसपटक ट्राभल मार्टमा केही नयाँ परियोजना सुरु गर्नुका साथै पर्यटकका लागि आकर्षण प्याकेज घोषणा गर्ने तयारी गरिरहेको छ । यसअघि नाट्टा बाँकेले नेपालगञ्ज–पोखरा सिधा उडान गर्नुका साथै नेपालगञ्जमा पर्यटकीय गतिविधि बढाउन ठूलो भूमिका खेल्दै आएको छ ।
