काठमाडौं । उपप्रधानमन्त्री तथा शहरी विकास मन्त्री प्रकाशमान सिंहले नेपाली युवाहरुलाई स्वदेशमै अध्ययन गरी राष्ट्र निर्माणमा योगदान दिन आग्रह गरेका छन् । बुधवार नेपाल विद्यार्थी संघ पाटन संयुक्त क्याम्पस इकाईले आयोजना गरेको नव आगन्तुक विद्यार्थी स्वागत तथा पुस्तकालय हस्तान्तरण कार्यक्रममा बोल्दै मन्त्री सिंहले यस्तो बताएका हुन् ।
उनले नेपालमा शैक्षिक गुणस्तरमा उल्लेखनीय सुधार भइसकेको बताए । उनका अनुसार, विगतमा नेपाली विद्यार्थीहरूले सीमित विषयहरू मात्र अध्ययन गर्न पाउने अवस्था भए पनि अहिले अन्तर्राष्ट्रिय स्तरमा पढाइ हुने विविध विषयहरू नेपालमै उपलब्ध छन् । त्यसैले स्वदेशमै अध्ययन गरेर समाज र देशलाई अघि बढाउन युवाहरूले ध्यान दिनुपर्ने मन्त्री सिंहको भनाई छ ।
नेपालमै बसेर अध्ययन गरी समाजको उन्नतिमा लाग्नुपर्ने उनको धारणा छ । ‘अहिले शैक्षिक गुणस्तरको विषयमा उठ्ने प्रश्नहरू पहिलेजस्तो छैनन् । अहिले विभिन्न विषयमा अध्ययन गर्ने अवसर नेपालमै छ । अन्तर्राष्ट्रिय स्तरका विश्वविद्यालयमा पढाइ हुने धेरै विषयहरू नेपालकै कलेजहरूमा उपलब्ध छन्,’ उपप्रधानमन्त्री सिंहले भने, ‘त्यसैले नेपालमै बसेर अध्ययन गरी समाजको उन्नतिमा लाग्नुपर्छ ।’
