उदयपुर । त्रियुगा नगरपालिका–११ स्थित बरूवा नदीले बर्सेनि कटान गरेको स्थानमा स्थायी तटबन्धन निर्माण शुरू भएको छ । बिहीबारदेखि गाईघाट शिवालय टोलस्थित बरूवा नदी कटान स्थानबाट स्थायी तटबन्धन निर्माण शुरू गरिएको त्रियुगा नगरपालिकाले जनाएको छ ।उक्त स्थायी तटबन्धनको त्रियुगा नगरपालिकाका प्रमुख वसन्तकुमार बस्नेतले औपचारिक शिलान्यास गरेपछि तटबन्धन निर्माणकार्य शुरू भएको हो ।
गाईघाटस्थित शिवालय टोलबाट मदन भण्डारी मार्गको बरूवा खोलाको पुलसम्म झण्डै डेढ किलोमिटर लामो तटबन्धन निर्माण औपचारिक रूपमा शुरू भएको छ ।सङ्घीय सरकार जलस्रोत तथा सिँचाइ मन्त्रालयले रू एक करोड बजेट व्यवस्थापन गरेपछि ६० मिटर लम्बाइको पक्की तटबन्धन निर्माण गरिन लागेको त्रियुगा नगरपालिकाका प्रमुख बस्नेतले बताए ।
रू एक करोडसम्मको बजेट योजना उपभोक्ता समिति गठन गरेर सञ्चालन गर्न सकिने हुनाले तटबन्धन निर्माणकार्य यहाँका स्थानीयको अगुवाइमा उपभोक्ता समिति गठन गरेर शुरू भएको हो ।यसपटकको बजेटले ६० मिटर तारजाली ढुङ्गासहितको तटबन्धन निर्माण हुने र स्थायी कलभर्ट निर्माण गर्न लागिएको त्रियुगाले जनाएको छ । शिवालय, साकेलासहित सङ्गम टोल बर्सेनि बरूवा नदी कटानको उच्च जोखिममा परेपछि तटबन्धन निर्माण शुरू गरिएको हो ।
यसबाट गाईघाट क्षेत्रका आठवटा टोलका झण्डै १० हजार बासिन्दा कटानको जोखिमबाट सुरक्षित हुने अवस्था रहेको बताइन्छ । विसं २०२९ मा पहिलोपटक बरूवा नदीले यस क्षेत्रमा कटान गर्दा यहाँका ६० घर विस्थापित भएका थिए भने गाईघाट बजारसहितका सय घरपरिवार विस्थापित भएको त्रिुगा नगरपालिकाले जनाएको छ । यस्तै, २०३७ सालको कटानले ४० घर विस्थापित भएका थिएभने २०५७ सालको कटानले १० घर विस्थापित भएका थिए ।
त्यसपछिका दिनमा अस्थायी तटबन्धन निर्माण गरेर तत्कालका लागि कटान रोक्ने काम हुँदै आएको त्रियुगा नगरपालिकाले बताएको छ ।बजेटको अभावमा त्रियुगा नगरपालिका, सङ्घीय सांसदसहितको सहयोग तथा पहलमा बजेट व्यवस्थापन शुरू भएपछि अब ५० वर्षपछि बरूवा नदीमा स्थायी तटबन्धन निर्माण शुरू भएको त्रियुगा नगरपालिकाले जनाएको छ ।
