अमेरिकाको न्यू अर्लिन्स शहरमा सवारी साधनले भीडलाई ठक्कर दिँदा १५ जनाको मृत्यु भएको छ ।
घटनामा परी अन्य ३० जना घाइते भएका छन् । एक जना बन्दुकधारीले चलाएको गाडीको ठक्कर बाट १५ जनाको मृत्यु भएको हो । मानिसहरूलाई लक्षित गर्दै कार चलाएका ती व्यक्तिले लगत्तै गोली समेत चलाएको अमेरीकी सञ्चार माध्यमले जनाएका छन् ।
मानिसहरूको घुइँचोलाई लक्षित गर्दै ती व्यक्तिले कार हुइँकाएका थिए । घटना भएको स्थानमा मानिसहरू नयाँ वर्षको स्वागतमा रमाइरहेका थिए । न्यू अर्लिन्सका मेयर लाटोया क्यान्ट्रेलले भने शहर ‘आतंकवादी हमला बाट प्रभावित’ भएको प्रारम्भिक प्रतिक्रिया दिएका छन् ।
अमेरिकी सञ्चार माध्यमका अनुसार प्रत्यक्षदर्शीहरूलाई उद्धृत गर्दै एउटा गाडीले ‘उच्च गतिमा’ भीडलाई ठक्कर दिएपछि त्यसको चालक बाहिर हाम फालेर हतियार चलाउन थालेको र प्रहरीले पनि जवाफी फायर गरेको जनाएको छ ।
