लन्डन – च्याम्पियन्स लिगको सुरुवाती तीन खेलमा जित हात पार्दै सनसनी फैलाएको एस्टन भिल्लाले पछिल्ला खेलमा लय गुमाएको छ।
चौथो खेलमा हारको सामना गरेको भिल्ला बुधबार राति युभेन्ट्ससँग घरेलु मैदानमा गोलरहित बराबरीमा रोकिएको हो। खेलको अन्तिम समयमा मोर्गान रोजर्सले गोल गरे पनि भिएआरबाट त्यो अस्वीकृत भयो।
स्टर्म ग्राजले पहिलो जित हात पारेको छ। ग्राजले गिरोनालाई १-० ले हराएको हो। लिलीले बोलोग्नालाई २-१ ले हरायो। सेल्टिक र क्लब ब्रुगले १-१ गोलको बराबरी खेले। पिएसभी आइन्डहोभनले साख्तर डोन्सटकलाई ३-२ ले हरायो।
वायर लिभकुकुसन, आर्सनल, मोनाको, अस्टनभिल्ला, स्पोर्टिङ सिपी, ब्रेस्ट र लिलीको १० अंक छ। वायरन म्युनिख, बेनफिका, एट्लेटिको म्याड्रिड र एसी मिलानको ८ अंक छ। साबिक विजेता रियल म्याड्रिड भने ६ अंकसहित २४ औं स्थानमा छ।
