काठमाडौं । बुद्धचित्त र रक्तचन्दनको समेत अवैधानिक कारोबार गर्दै आएका गुण्डा नाइके सत्यमान लामा चेक बाउन्स मुद्धामा प्रहरीले पक्राउ गरेको छ । चेक बाउन्स मुद्दामा कैदसहित जरिवाना फैसला सुनाइएका लामालाई प्रहरीले आइतबार साँझ पक्राउ गरिएको जिल्ला प्रहरी परिसर काठमाडौंका प्रवक्ता प्रहरी उपरीक्षक नवराज अधिकारीले जानकारी दिए ।
उनका अनुसार काभ्रेको तेमाल घर भई काठमाडौं महानगरपालिका –४ बस्दै आएका लामालाई जिल्ला अदालत काठमाडौंले २०८० चैत २७ गते २ वर्ष कैद र ३० लाख बिगो र ३० लाख जरिवाना सजाय हुने फैसला गरेको थियो । पक्राउ परेका सत्यमान दावा लामाका सहयोगी समेत रहेको प्रहरीले जनाएको छ ।
लामा २०७५ सालमा किसानको बुद्धचित्त माला लुटपाट गरेको आरोपमा पनि पक्राउ परेका थिए । सत्यमान पटक–पटक ठगी गरेको आरोपमा पक्राउ परेका थिए । उनलाई अपराध महाशाखाले काभ्रेको तेमालमा भूकम्प पीडितका लागि अस्पताल बनाउने नाममा एक करोड ७५ लाख ठगेको आरोपमा समेत पक्राउ गरेको थियो ।
प्रवक्ता एसपी अधिकारीका अनुसार पक्राउ परेका लामालाई सजाय भुक्तानीका लागि अदालतमा उपस्थित गराएर कारागार पठाइने तयारी भएको छ ।
