पोखरा, १६ पुस । धरान फुटबल क्लबलाई २–० गोल अन्तरमा पराजित गर्दै सशस्त्र प्रहरी बल(एपीएफ क्लब) पोखराको मैदानमा डिफेण्डिङ च्याम्पियनको शाख जोगाएको छ । कमजोर मानिएको धरानले सशस्त्रलाई कडा चुनौति पेश गर्यो । पहिलो हाफमा व्यहोरेको गोल नै धरानको यात्रा शनिबार टुंगिदाँ सशस्त्रलाई जितको लागि पर्याप्त बन्यो । दोस्रो हाफमा पाएका केही अवसरलाई धरानले उपयोग गर्न नसक्दा आहा रारा पोखरा गोल्डकपको सेमिफाईनल यात्रा तय गर्न सकेन् ।
पहिलो गोलको खोजीमा रहेको सशस्त्रले झण्डै ३७ मिनेट कुर्नु पर्यो । विकु तामाङको फ्लिक बल गोलमा परिणत भएपछि सशस्त्रले पोखरामा विभागीय क्लबको शाखलाई जोगाउन उद्दत देखियो । धरानका गोलकिपर अगाडि बढेको अवस्थामा हल्का फ्लिक गरेको बलले जाली चुमेपछि विभागीय क्लबले अग्रता लियो ।
त्यसको तीन मिनेटपछि सशस्त्र धरानमाथि हावी हुदैं दोस्रो गोल गर्यो । युवराज खड्काले दोस्रो गोल गर्दै अग्रता दोब्बर बनाए । अन्तत उनको गोल नै सशस्त्रको लागि अन्तिम गोल बन्यो । नवीन लामाले प्रदीप लामालाई पास उपलब्ध गराए । प्रदीपले दिएको क्रस पासलाई युवराजले डिबक्स भित्र रोकेपनि प्रहार गर्न चुके । रोकेको बललाई विकु तामाङले प्रहार गरे । तामाङको प्रहार धराने गोलकिपरबाट रिफ्लेक्ट हुन पुग्यो । रिफ्लेक्ट बललाई युवराजले पोष्टको दिशा दिएपछि धरानको आशा लगभग समाप्त भएको थियो ।
पहिलो हाफमै दुवैले केही मुभ बनाए । तर फिनिसिङ शसस्त्रले गर्यो । जितको हकदार बन्यो । ३२ औं मिनेटमा युवराज खड्काको पासलाई नवीन लामाले छोटो दुरीबाट हानेको हेड धराने गोलकिपरकै हातमा परेको थियो । खेलको ९ मिनेटमा धरानले अवसरलाई गुमायो । बर्तमान राईले डिबक्स भित्र पाएको अवसरलाई गुमाउन पुगे । २७ औं मिनेटमा पनि उस्तै अवसरलाई गुमाउदाँ धरानको यात्रा अघि बढ्ने सम्भावना कमजोर बन्दै गएको थियो । तपन कार्कीको क्रस बललाई प्रकाश बुढाथोकीले प्रहार गरेपनि सशस्त्रका मनबहादुर मगर बाधक बने ।
सशस्त्रले खेलको ५९ औं मिनेटमा पाएको अवसरलाई गुमाउँदा गोल अन्तर बढ्न सकेन् । सशस्त्रका म्यान अफ दि म्याच विकुले गोलकिपर वीट भईसकेको अवस्थामा समेत खाली पोष्टमा जाली चुमाउन सकेनन् । उनको प्रहार बाहिरिएपछि बेन्चमा बसेको खेलाडी र अफिसियल निराश बनेका थिए । अन्तिम समयमा आईपुग्दा शसस्त्रका अनमार्क बसेका प्रदीप लामाको प्रहार समेत बाहिरिन पुग्यो । उनलाई सनिष श्रेष्ठले पास उपलब्ध गराएका थिए ।
धरानले ६७ औं मिनेटमा गोल गर्ने अवसरलाई खेर फाल्यो । डोना थापाको पासलाई रोमन लिम्बुको फितलो प्रहारलाई शसस्त्रका गोलकिपरले बचाउ गरे । सशस्त्रका गोलकिपर सेकेण्ड बारमा रहँदा उनले फष्ट बार च्यापेर सशक्त प्रहार गर्न सकेनन् । ‘खेलाडीहरु बढी कन्फिडेन्ट देखिए । दोस्रो हाफमा पाएको अवसलाई गुमायौं’ सशस्त्रका प्रशिक्षक रत्नकाजी महर्जनले भने–‘अर्को खेलमा सुधार गर्छौ ।’
सहारा क्लबको आयोजना तथा हिमश्री फुड्स प्रालिको उत्पादन आहा रारा चाउचाउको मुख्य प्रायोजन रहेको २२ औं आहा रारा गोल्डकपको आईतबार चर्च ब्वाईज युनाईटेड र मछिन्द्र फुटबल क्लबसँग दोस्रो क्र्वाटरफाईनल खेल हुने छ ।
