काठमाडौं । चालु आर्थिक वर्ष २०८१/८२ को पहिलो दुई महिनाको अवधिमा वैदेशिक अध्ययनमा जाने विद्यार्थीसँगै २८ अर्ब रुपैयाँ भन्दा बढी रकम नेपालबाट बाहिरिएको छ । नेपाल राष्ट्र बैँकको तथ्यांक अनुसार साउन र भदौ महिनामा मात्रै वैदेशिक अध्ययनका लागि २८ अर्ब १६ करोड रुपैयाँ विदेशिएको हो ।
गत आ.व.को सोही अवधिमा २३ अर्ब ३३ करोड रूपैयाँमात्र विदेशिएको थियो । उच्च शिक्षा अध्ययनका लागि विदेशिने युवाको संख्या बढेसँगै नेपाली मुद्रा विदेशिने क्रम पनि बढेको हो । गत साउन महिनामा मात्रै १४ अर्ब ९२ करोड रुपैयाँ अध्ययनका लागि विदेशिएको थियो ।
केन्द्रीय बैँकको तथ्यांक अनुसार गत आवमा मात्रै अध्ययनका लागि मुलुकबाट एक खर्ब २५ अर्ब १३ करोड रुपैयाँ बाहिरिएको छ । अघिल्लो वर्षको तुलनामा यो रकम २४ प्रतिशतले बढी हो । आव २०७९/८० मा विदेश अध्ययनकै लागि एक खर्ब ४२ करोड रुपैयाँ बाहिरिएको थियो भने आ.व. २०७८/७९ मा ६७ अर्ब ७० करोड बाहिरिएको थियो । त्यस्तै आ.व. २०७५/७६ मा ४६ अर्ब ३२ करोड र आ.व. २०७६/७७ मा २५ अर्ब ८१ करोड रुपैयाँ बाहिरिएको थियो ।
