काठमाडौं । पोर्चुगलको लिस्बनमा रहेको अवैतनिक नेपाली महावाणिज्यदूतको कार्यालय बन्द भएको छ । त्यहाँस्थित नेपाली महावाणिज्यदूत मकरबहादुर हमालका विरुद्धमा अनियमितताको आरोपमा अख्तियारमा उजुरी परेपछि सो महावाणिज्यदूतको कार्यालय बन्द भएको हो ।
नेपाल सरकारले उनलाई सन् २०१४ मा अवैतनिक वाणिज्यदूत नियुक्त गरेको थियो र पछि बढोत्तरी गरेर महावाणिज्यदूत बनाएको थियो ।
उनको कार्यकाल यही जुलाई ११ सम्म रहेको र आफ्नो कार्यकाल थप गर्नका लागि उनले परराष्ट्र मन्त्रालयमा आवेदन पनि गरेका थिए ।
तर त्यहाँ रहेका नेपालीहरुका विभिन्न शीर्षकका रकम उनले अपचलन गरेको भनेर उनका विरुद्धमा अख्तियारमा उजुरी परेपछि त्यसको छानबिन भइरहेकाले तत्कालका लागि उनको म्याद थप्न नहुने परराष्ट्र मन्त्रालयले जनाएको हो ।
उनको नवीकरण नहुँदा नेपालीका दैनिक समस्याहरु समाधान गर्न, अड्डा अदालतमा बहस, पैरवी गर्न र विभिन्न सरकारी निकायसँग समन्वय गर्ने कार्य समेत हाल हुन सकिरहेको छैन ।
हाल त्यहाँबाट हुने गरेका सम्पूर्ण सेवाहरुको लागि नेपाली राजदूतावास पेरिसमा सम्पर्क गर्नुपर्ने भएको छ । पोर्चुगलमा सरकारले राजदूताबास स्थापना गरेर राजदूत नियुक्ति पनि गरिसकेको छ, तर पनि त्यहाँ पुग्न समय लाग्ने भएको छ ।
तर यता हमालका विरुद्धमा भने नेपालीहरुको रकम अपचलन गरेको, भूकम्प देखि विभिन्न समयमा रकम उठाएर सम्बन्धित व्यक्ति तथा पक्षसमक्ष नपुर्याएको र नेपालीहरुलाई दिनुपर्ने सेवाका लागि बढी रकम लिएको भनेर त्यहाँ रहेका नेपालीहरु मार्फत् नै अख्तियारमा उजुरी परेको छ ।
यो उजुरी पछि उनको म्याद परराष्ट्रको प्रोटोकल शाखाले थप्न नहुने जनाएपछि हाल रोकिएको छ । यसबाट विभिन्न देशमा रहेका नेपालका बाणिज्यदूतका कार्याहरुको पारदर्शिताको प्रश्न पनि उठेको बताइन्छ ।
उनको यो उजुरी पछि अब विश्वका विभिन्न देशमा रहेका बाणिज्यदूत एवं महावाणिज्यदूतहरुले दिइरहेको सेवा, उनीहरुले नेपालीहरु समक्ष ती सेवाका लागि लिने गरेको दस्तुरको पुनरावलोकन हुनुका साथै उनीहरुमार्फत् ती देश तथा स्थानमा रकम संकलनजस्ता कार्यको पारदर्शिताका विषयमा अब परराष्ट्रले एक मेकानिजम बनाएर काम गर्ने जनाएको छ ।
