काठमाडौं । गएराति करिब १० बजे जाजरकोटको कुशे गाउँपालिकामा पहिरो जाँदा तीन जना घाइते भएका छन् ।
कुशे गाउँपालिका–८ स्थित भूकम्प पीडितको अस्थायी टहरामा बसिरहेका बेला पहिरो जाँदा ३४ वर्षीया कमला थापा, १६ वर्षीया निरमाया थापा र ४ वर्षीया हस्तिका थापा घाइते भएका हुन् ।
घाइते भएकाहरुलाई उपचारका लागि हेलिकप्टरमार्फत नेपालगञ्ज ल्याउने तयारी भइरहेको कुशे गाउँपालिका–८, वडाध्यक्ष डिल्लीबहादर सिंहले जानकारी दिए । वडाध्यक्ष सिंहका अनुसार घाइतेमध्ये हस्तिकाको अवस्था गम्भीर छ । उनको होश आउने जाने भइरहेको छ भने निरमाया थापाको दुवै खुट्टामा चोट लागेको छ ।
गतवर्ष कात्तिक १७ गते जाजरकोट केन्द्रबिन्दु भएर गएको भूकम्पले ठूलो जनधनको क्षति भएको थियो । उक्त भूकम्पले कुशे गाउँपालिका ७, ८, ९ लगायतका वडामा क्षति पुयाएको थियो । बसेको घर भूकम्पले भत्काएपछि गाउँलेहरु अस्थायी टहरामा बसिरहेका छन् ।
