पोखरा, २७ मंसिर । शिक्षानीति लागु गर्न कार्यनीति र रणनीति निर्माणका लागि गठन गरिएको रणनीतिक योजनाको मस्यौदा पेश भएको छ । शिक्षा, संस्कृति, विज्ञान प्रविधि तथा सामाजिक विकास मन्त्रालयमा भएको एक कार्यक्रममा मन्त्रालयका मन्त्री मेखलाल श्रेष्ठलाई योजना तयारी कार्यदलका संयोजक तथा पूर्व महानिर्देशक (सह–सचिव) बाबुराम पौडेलले पेस गरेका हुन् ।
संयोजक पौडेलले आफूले महत्वपूर्ण शिक्षा रणनीतिक योजनाको काम गर्दा खुशी लागेको बताए । ‘यो काम असाध्यै ठूलो र महत्वपूर्ण रहेको र शाखा महाशाखाबाट प्राप्त भएको सहयोगले असाध्यै सन्तुष्टि प्राप्त भएको र मन्त्रालयले उच्च सम्मान गरेकाले आफूलाई खुशी अनुभुति भएको छ’ उनले भने।
मन्त्री श्रेष्ठले रणनीति तयार भएको नीति कार्यदलबाट पास हुने विश्वस्त रहेको र सहयोगी सबैलाई धन्यवाद व्यक्त गरे। शिक्षा क्षेत्रको रणनीतिक योजनाको मस्यौदा लिँदै मन्त्री श्रेष्ठले मसिनोगरी केलाएर रणनीति योजना तयार गरेको हुँदा अबको शिक्षा क्षेत्रले नयाँ फड्को मार्ने विश्वस्त रहेको बताए ।
मन्त्रालयले ०७८ फाल्गुन १८ गतेको निर्णयअनुसार शिक्षा नीति कार्यन्यवयनका लागि शिक्षा क्षेत्रको रणनीतिक योजना तयारको लागि बाबुराम पौडेलको संयोजकत्वमा ४ सदस्यीय कार्यदल गठन गरेको थियो। उक्त कार्यदलको सदस्यमा प्रा.डा इन्द्रप्रसाद तिवारी, भिमाद नगरपालिकाका उपसचिव पदमराज आचार्य, पूर्व उपसचिव केशरीरमण न्यौपाने र शिक्षा, संस्कृति, विज्ञान प्रविधि तथा सामाजिक विकास मन्त्रालयका सदस्य सचिव तोयानाथ लम्साल थिए।
उक्त प्रतिवेदनको तयारीमा मुख्यमन्त्रीको उपस्थितिमा छलफल भई प्राप्त सुझावहरुलाई समेटी रणनीति तय गरिएको सदस्य सचिव लम्सालले जानकारी गराए। सदस्य सचिव लम्सालले उक्त प्रतिवेदनमा दिगो विकास लक्ष्य एवं राष्ट्रिय शिक्षा नीति–२०७६, चालु शिक्षा योजनासहितका कार्यक्रमहरु समावेश गरी काम गरेको हुँदा यसले भावी दिनमा महत्वपूर्ण प्रभाव पार्ने जानकारी गरए।
