काठमाडौं । लामो समय अघिदेखि नेपालमा गाँजाको खेतीबारे जारी रहेको बहसमा शुक्रबार अर्थमन्त्री वर्षमान पुनले गाँजा खेतीबारे वास्तविक कुरा बोलेका छन् । उनले शुक्रबार प्रतिनिधि सभाको कृषि समितिको बैठकमा बोल्दै गाँजाले बनेको झोला बोकेर बजेट प्रस्तुत गरेको बताएका हुन् । अर्थमन्त्री पुनले बोलेको वास्तविक सन्देशमा गाँजाबाट थुप्रै कुरा निर्माण गर्न संभव छ ।
प्रतिनिधि सभाको कृषि समितिले बजेटमा उल्लेख भएको ‘गाँजा व्यावसायिक उत्पादन गर्ने’ सम्बन्धी छलफलमा अर्थमन्त्री पुनले नेपाली उत्पादनको ब्याग भनेर बजेट बाेकेकाे ब्याग नै गाँजाको हो । कसले उत्पादन गर्यो थाहा थिएन । गाँजाको झोला बोकेर बजेट प्रस्तुत गरियो उनले भने ।
उनले गाँजाको उत्पादन गाउँगाउँमा अप्रत्यक्ष रूपमा गरिएको बताएका छन् । उनले दाना उत्पादन, रेसा उत्पादन भइरहेको भेटिन थालेको बताएका छन् । अर्थमन्त्री पुनले भने,‘ अनुसन्धानका लागि गाँजा तत्काल खुला गरौं । धेरै डराउनुपर्दैन, अरू उत्पादनलाई बिस्तारै कानुनी व्यवस्था गर्दै जाउँला ।’
यस्तै गृहमन्त्री रवि लामिछानेले गाँजा खेतीको सम्भाव्यता अध्ययनका लागि एक महिनाभित्रै नियमावली बन्ने बताएका छन्। लामो समयसम्म गाँजाका विषयमा बहस जारी भइरहँदा समेत नबोलेका गृहमन्त्री लामिछानेले पहिलो पटक शुक्रबार प्रतिनिधि सभाको कृषि समितिमा बोल्दै यस्तो बताएका हुन् । ‘मलाई चाहीँ के लाग्छ भने पर्याप्त छलफल भएको र अध्ययन भएको अवस्थामा अब हामीमा दुविधा राख्नुपर्ने अवस्था मैले देखेको छैन । गृहमन्त्रीको हैसियतले म यो सम्मानित समितिलाई यो भन्न चाहन्छु, यसको औषधिजन्य प्रयोग र व्यवसाय गर्नका लागि गृहमन्त्रालयले छिट्टै नै नियमावली बनाउँछ,’– उनले भने ।
बैठकमा प्रतिनिधि सभाको कृषि समिति सभापति डा.आरजू राणा देउवाले नियमावली तर्जुमामा देखिएको गृहको तदारुकताप्रति खुशी व्यक्त गरिन् । गाँजा खुला गर्ने पहिलो पाइलाको रुपमा एक महिनाभित्र नियमावली बनाउने गृहमन्त्रीको प्रतिबद्धता सकारात्मक रहेको उनको भनाई थियो ।
सरकारले आगामी आर्थिक वर्षको बजेटमै तोकेर औषधीय प्रयोगका लागि गाँजाको व्यावसायिक उत्पादन खुला गर्न कानुन बनाउने घोषणा गरेको छ । त्यसैअनुरुप कानुन तर्जुमामा आवश्यक सहजीकरणका लागि समिति सभापति राणाले गृह र अर्थ मन्त्रालयलाई निर्देशनसमेत दिएकी छन् ।
