काठमाडौं जिल्ला अदालथले १४ किलो सुन तस्करी प्रकरणमा गरेको आदेश उच्च अदालत पाटनले समेत सदर गरेको छ । उच्च अदालत पाटनले बिहीबार सबै प्रतिवादीहरूलाई पुर्पक्षका लागि थुनामा पठाउने आदेश गरेको हो। उच्च अदालतका न्यायाधीशहरु हरिप्रसाद पौडेल र हेमन्त रावलको इजलासले उनीहरूलाई थुनामा पठाउने आदेश गरेको हो।
जिल्लाको थुनामा पठाउने आदेश बिरुद्ध उच्च अदालत पुगेका सन तस्करी प्रकरणका आरोपीहरुका लागि अब सर्वोच्चको बाटो खुलेको छ ।
उच्चले सुन तस्करीको अभियोगमा थुनामा रहेका लेकबहादुर तामाङ, रमेश देउला ,अनिल श्रेष्ठ, राधाकृष्ण श्रेष्ठ, शेरबहादुर बस्नेत ,कृष्णकुमार श्रेष्ठ, मीनबहादुर घले र जीवन गुरुङलाई थुनामा पठाएको हो ।
जिल्ला अदालत काठमाडौँले २०८० पुस २३ गते सुन तस्करी प्रकरणमा पक्राउ परेका ८ जनालाई पुर्पक्षका लागि थुनामा पठाउने आदेश गरेको थियो ।
जिल्ला अदालत काठमाडौँका न्यायाधीश शङ्करबहादुर राईको इजलासले सबै प्रतिवादीलाई पुर्पक्षका लागि थुनामा पठाउन आदेश गरेको थियो ।
दुबईबाट १४ किलो सुन लिएर आएका गोरखाका चन्द्र घलेलाई पक्राउ गरेपछि तस्करीबारे रहस्य खुलेको थियो। विमानस्थल भन्सार कार्यालयले अनुसन्धानका क्रममा यो समूहले १३८ किलो सुन तस्करी गरेको भन्दै सोही बराबर बिगो र जरिवाना दाबी गरेको छ।
उनीहरूविरुद्ध एक अर्ब ४० करोड ५५ लाख रुपैयाँ बिगो तथा दुईदेखि पाँच वर्षसम्मको कैद सजाय माग दाबी अभियोग पत्रमा गरिएको थियो ।
घटनामा संलग्न हुने प्रतिवादीले पटक–पटक गरी एक सय ३८ किलो सुन चोरी–पैठारी गरेकाले एक अर्ब ४० करोड ५५ लाख रुपैयाँ बिगो तथा दुईदेखि पाँच वर्षसम्म कैद सजाय माग दाबी अभियोग पत्रमा गरिएको थियो ।
यस्तै तस्करीको सुन विमानस्थलबाट गिरोहको घरसम्म पु¥याइदिने काम विमानस्थलका कर्मचारीहरू राधाकृष्ण श्रेष्ठ, लेकबहादुर तामाङ, रमेश देउला, अनिल श्रेष्ठ, शेरबहादुर बस्नेतले गरेको अभियोग पत्रमा दाबी गरिएको थियो ।
उनीहरू नागरिक उड्डयन प्राधिकरण अन्तर्गतका कर्मचारी हुन्। उनीहरूले धनबहादुर गुरुङसँग घुस लिई सुन चोरी पैठारी गरेको अभियोग पत्रमा उल्लेख छ।
सुन तस्करीमा नाम जोडिएका र बयान पोलेका अङ्कित अग्रवाल, राजेन्द्र बस्नेत, विमल पोद्दार, राजकुमार भारती, जीवन गुरुङ, गुरु भन्ने व्यक्तिहरूको यकिन नाम, थर, वतन र कसुर खुलेका बखत अभियोग पत्र पेस गरिने भनिएको थियो ।
