काठमाडौं । गाजा युद्धमा अधिक शक्ति प्रयोग गरी नरसंहार गरेको अभियोगमा अन्तर्राष्ट्रिय फौजदारी अदालत आइसीसीले इजरायली अधिकारीविरुद्ध पक्राउ पूर्जी जारी गर्ने सम्भावना बढेको छ ।
आइसीसीले केही समयदेखि गाजाका युद्धग्रस्त क्षेत्रहरुमा इजरायली सैन्य कारबाहीको अनुसन्धान गरी कानुनी कदम चाल्न थालेको हो । आइसीसीले हमासका पछिल्ला गतिविधिहरुको पनि निगरानी गरिरहेको जनाएको छ ।
संयुक्त राष्ट्रसंघ अन्तर्गतको फौजदारी अदालतले युद्ध अपराधको आशंकामा इजरायली उच्च सैन्य र राजनीतिक नेतृत्वलाई पक्राउ पुर्जी जारी गर्ने योजना अघि बढाएको बीबीसीले उल्लेख गरेको छ ।
आफूविरुद्ध पक्राउ पूर्जी जारी हुनसक्ने आशंकामा इजरायली अधिकारीहरु चिन्तित देखिएको पनि बीबीसीले जनाएको छ । पक्राउ पर्नेहरुको सूचीमा प्रधानमन्त्री बेन्जामिन नेतान्याहुको नामपनि रहनसक्ने बताइएको छ ।
आइसीसीसँग अन्तर्राष्ट्रिय कानून अन्तर्गत गम्भीर युद्ध अपराधका लागि व्यक्तिहरूलाई अभियोग लगाउने र मुद्दा चलाउने अधिकार छ । आइसीसीले यसअघि रुसी राष्ट्रपति भ्लादिमिर पुटिन, लिबियाका मुअम्मर गद्दाफी र युगान्डाका लडाकु जोसेफ कोनी लगायत नेताविरुद्ध पनि पक्राउ पुर्जी जारी गरिसकेको छ ।
आइसीसीले पक्राउपुर्जी जारी गर्न सक्नेतर्फ लक्ष्यित गर्दै प्रधानमन्त्री नेतान्याहुले “इजरायलको आत्मरक्षा क्षमतालाई कम गर्ने प्रयास हुने” प्रतिक्रिया दिनुभएको छ ।
