नवलपरासी। बर्दघाट सुस्तापूर्व नवलपुरको कावासोती–१७ का मीनबहादुर महतोले धान लगाउने खेतमा खरबुजा लगाएर आकर्षक आम्दानी गरिरहेका छन्।
करिब तीन बिघा जग्गा भाडामा लिएर उनले खरबुजा लगाएका छन्। ‘पहिला तरकारी लगाउँथेँ। बजार नपाएपछि खरबुजा लगाएँ। प्रशस्त आम्दानी भएको छ’, उनले भने।
वरपर कतै चैतेधान कतै मकै लगाइएको छ। हाल खरबुजा लगाइएको क्षेत्रमा यसअघि करेलाखेती गरेकामा यो पटक खरबुजा लगाएर सफल भएको महतोले बताए। सरस्वती जातको खरबुजा लगाएका उनले हालसम्म ८० क्विन्टल हाराहारीमा बिक्री गरेको जानकारी दिए। चैतको पहिलो हप्तादेखि उत्पादन शुरु भएर जेठसम्म खरबुजा फल्ने उनले बताए। ६ लाख आम्दानी हुने अनुमान गरिकोमा उत्पादन बढेकाले सोचेभन्दा धेरै आम्दानी हुने देखिएकोमा उनी ढुक्क देखिए।
आफूले उत्पादन गरेको खरबुजा बिक्रीमा कुनै समस्या नभएको महतोले बताए। जिल्लाको स्थानीय बजारमा खरबुजा खपत हुँदै आएको छ। आफूहरूले कुनै विषादी प्रयोग नगरी उत्पादन गरेकाले बारीबाटै दैनिकजसो दुई क्विन्टल बिक्री हुने गरेको उहाँले बताए। ‘यसलाई खासै औषधि हाल्नु परेन। प्राङ्गारिक मल नै धेरै प्रयोग गरियो’, उनले भने, ‘उत्पादन पनि सोचेभन्दा धेरै भयो, स्थानीय उत्पादन भनेपछि बारीबाटै किनेर लैजाने धेरै हुन्छन्। खरबुजाखेतीमा खासै खर्च र मेहनत गर्नुनपरेको उनको भनाइ छ।
रोजगारीको सिलसिलामा सिङ्गापुर र साउदी अरबमा सात वर्ष बिताएका महतोले अहिले आफ्नो फार्ममा दैनिक नौ जनालाई रोजगारी दिएका । कावासोती नगरपालिका–१७ का वडासदस्यसमेत रहका उनी ६ वर्षदेखि व्यावसायिक कृषिमा संलग्न छन्। ‘रोजगारीका लागि विदेश नै जानुपर्छ भन्ने छैन’, उनी भन्छन्, ‘कृषिकर्मबाट पनि कमाउन सकिन्छ।’
